Ներքին գործերու նախարարի պաշտօնակատար Պասսամ Մաուլաուի յայտնեց, որ Լիբանանի հիւսիային եւ Աքքար նահանգներուն մէջ քաղաքապետական եւ թաղապետական ընտրութիւնները տեղի պիտի ունենան 19 Մայիսին: Նշենք, որ ընտրութիւնները արդէն յետաձգուած են երկու անգամ եւ կը կարծուի, որ շուտով պիտի վաւերացուի երրորդ յետաձգումը, թէեւ Ներքին գործերու նախարարութիւնը կը փորձէ ամբողջացնել նախապատրաստական աշխատանքները:
Լիբանանեան ուժեր կուսակցութեան նախագահ Սամիր Ժաաժաա կարծիք յայտնեց, որ Լիբանանի մէջ դիմադրութեան ճակատն ու Ազգային ազատ հոսանքը կ’ուզեն խուսափիլ քաղաքապետական եւ թաղապետական ընտրութիւններէն: «Խորհրդարանի նախագահ Նեպիհ Պըրրի Խորհրդարանի դիւանը հրաւիրած է ժողովի, շատ հաւանաբար քաղաքապետական ընտրութիւնները երրորդ անգամ յետաձգելու որպէս նախապատրաստութիւն», ըսաւ Ժաաժաա: Ան քաղաքական բոլոր ուժերուն կոչ ուղղեց չզօրակցելու ընտրութիւնը վերստին յետաձգելու առաջարկին, թէեւ քաղաքապետութիւններուն մեծամասնութեան աշխատանքը անդամալուծուած է:
