Վարչապետի պաշտօնակատար Նեժիպ Միքաթիի հրաւէրով, երէկ վարչապետարանին մէջ տեղի ունեցաւ նախարարներու խորհրդակցական ժողով, որ նուիրուած էր շրջանային զարգացումներու եւ Լիբանանի ապահովական վիճակի արծարծումին, նաեւ սուրիացիներու տեղահանութեան թղթածրարին: Միքաթի ժողովին ընթացքին Ներքին գործերու նախարարութենէն պահանջեց խստացնել օրէնքներու գործադրութիւնը եւ կանխել խախտումները տեղահանուած սուրիացիներուն կողմէ: Տեղեկատուութեան նախարարի պաշտօնակատար Զիատ Մաքարի հանդիպումէն ետք յայտարարեց, թէ Միքաթի կարեւորած է Լիբանանի ներքին խաղաղութեան պահպանումը, դրուատելով ապահովական ուժերուն դերակատարութիւնը: Ժողովականները քննարկած են սուրիացիներու տեղահանութիւնը, որոշելով գործադրել լիբանանեան օրէնքները բոլորին վրայ: Ժողովականները նաեւ առնչակից մարմիններէն պահանջած են փակել սուրիացիներուն պատկանող ապօրինի հաստատութիւնները եւ զերծ մնալ քաղաքական միջամտութիւններէն:
Ներքին գործերու նախարարի պաշտօնակատար Պասսամ Մաուլաուի յայտնեց, որ Լիբանան ապաստանած երկու միլիոն սուրիացիներէն միայն 300 հազարը ունին կեցութեան արտօնագիր, 800 հազարը կը կրեն տեղահանութեան կարգավիճակ, իսկ մէկ միլիոն երկու հարիւր հազարը ընդհանրապէս չեն գրանցուած:
Ազգային ազատ հոսանքի նախագահ, երեսփոխան Ժըպրան Պասիլ շեշտեց սուրիացի տեղահանուածներուն թղթածրարին հարցով խօսքէն գործի անցնելու անհրաժեշտութիւնը: Դիտել տալով հանդերձ, որ սուրիացիներուն տեղահանութիւնը գոյութենական վտանգ կը սպառնայ Լիբանանին, Պասիլ շեշտեց, որ ոչ-բոլոր գաղթականները ոճրագործ են, ուստի կարելի չէ խնդիրը լուծել անոնց նկատմամբ բռնութիւն գործադրելով, այլ անհրաժեշտ է երկրէն վտարել լիբանանեան բանտերուն մէջ գտնուող սուրիացիները, նաեւ անոնք, որոնք ապօրինաբար մուտք կը գործեն Լիբանան: Պասիլ լիբանանեան քաղաքապետութիւններուն կոչ ուղղեց հետեւելու իրենց իշխանութեան շրջաններուն մէջ գտնուող սուրիացիներուն եւ հեռացնելու բոլոր օրինախախտները, աւելցնելով որ անհրաժեշտ է չեղարկել գաղթականի կարգավիճակը այն սուրիացիներէն, որոնց պայմանները համահունչ չեն տեղահանութեան կարգերուն:
