Հայաստանի Հանրապետութեան վարչապետ Նիկոլ Փաշինեանի գլխաւորութեամբ տեղի ունեցած է խորհրդակցութիւն, որուն ընթացքին քննարկուած են «Ակադեմական քաղաք»-ին գլխաւոր յատակագիծին եւ փոխադրամիջոցներու ենթակառուցուածքներուն վերաբերող հարցեր:
Խորհրդակցութեան մասնակցած են «Ակադեմական քաղաք» հիմնադրամի հոգաբարձուներու խորհուրդի անդամները, Ակադեմական քաղաքի գլխաւոր յատակագիծը նախագծող gmp International GmbH Architects and Engineers ընկերութեան փոխտնօրէն Թոպիաս Քէյլը, պատասխանատու գերատեսչութիւններու ղեկավարներ:
Թոպիաս Քէյլը ներկայացնելով գլխաւոր յատակագիծը, նշած է, որ հիմնական քաղաքներէն հեշտութեամբ՝ 2 ժամուան մէջ, կարելի է հասնիլ Ակադեմական քաղաք, քանի որ վայրի առումով տեղանքը բաւականին լաւ է՝ մօտ է ե՛ւ օդակայանին, ե՛ւ Հիւսիս-հարաւ մայրուղիին: Մանրամասնութիւններ ներկայացուած են համալսարաններու տեղակայման, կացարաններու, ճանապարհային ցանցի, բնավայրի վերաբերեալ: Անոր խօսքով՝ նախագիծի մշակման ընթացքին հաշուի առնուած է թամանեանական նախագիծը՝ անով փորձելով կապ հաստատել Երեւանի պատմութեան հետ:
«Անցեալ անգամ մենք կը խօսէինք «Հայֆիլմ»-ի հետ համարկման մասին: Մենք ունեցած ենք չորս յաջողակ խումբեր, որոնք շատ հետաքրքրական նախագիծեր ներկայացուցած են, թէ ինչպէս կարելի է «Հայֆիլմ» սթուտիոյի տարածքը վերակենդանացնել: Յոյսով եմ, որ կը կարենանք այս գաղափարները բերել Հայաստան», յաւելած է GMP միջազգային ընկերութեան փոխտնօրէնը:
Թոպիաս Քէյլի ընդգծած է, որ նախագիծի շրջանակին մէջ կ՛ուսումնասիրուի նաեւ կայունութեան թեման, որովհետեւ Ակադեմական քաղաքը ապագային համար է եւ այն պէտք է կեդրոնացած ըլլայ այնպիսի թեմաներու վրայ, որոնք կը վերաբերին ոչ միայն այսօրուան, այլ նաեւ վաղուան:
Վարչապետին խօսքով՝ քաղաքի հասկացողութեան հետ կապուած մեծ հարցեր այլեւս չկան եւ պէտք է անդրադառնալ հայեցակարգային կէտերուն.
«Տեսլականի առումով՝ մենք գործնականին մէջ գործընթացի ամէն քայլը, ամէն շարժը տեսած ենք: Հարցեր ունեցած ենք, վերապահումներ չենք ունեցած: Ի հարկէ, սա այն է, ինչ մենք կ՛ուզենք»,- ըսած է Նիկոլ Փաշինեան:
Խորհրդակցութեան ընթացքին քննարկուած է նաեւ փոխադրութեան եւ ճանապարհային ցանցի, փոխադրութեան այլընտրանքային միջոցներու տեխնիկատնտեսական վերլուծութեան իրականացման ձեւաչափի հարցը, անդրադարձ կատարուած է քաղաքաշինական զարգացման եւ գոյքի կառավարման ձեւի մշակման ընթացակարգերու հետ կապուած թեմային:
Փոխադրական ենթակառուցուածքի զարգացման թեմային հետ կապուած՝ վարչապետը անդրադարձած է «Սասունցի Դաւիթ» կայարանէն երկաթուղիով դէպի Ակադեմական քաղաքի հատուած կատարած շրջայցին:
«Իմ տպաւորութիւնն, անկեղծ ըսեմ, գոնէ առաջին հատուածէն ես չէի սպասեր, որ մենք հիմա կ՛երթանք եւ կէս ժամէն կը հասնինք այնտեղ»,- նշած է Նիկոլ Փաշինեան եւ յաւելած, որ փոխադրական ենթակառուցուածքներու ճշգրիտ ձեւաւորման համար անհրաժեշտ է ձեւաւորել այն միջին վիճակագրական մարդը, որ պիտի մնայ Ակադեմական քաղաքին մէջ եւ ով որ ամէն օր պտիի գայ եւ ետ երթայ:
Հանդիպման ընթացքին քննարկուած է նաեւ այն աշխատանքներուն շրջանակը, որ արդէն իսկ կարելի է մեկնարկել: Նշուած է, որ Ակադեմական քաղաքի գլխաւոր յատակագիծի հաստատումէն յետոյ, յաջորդիւ պիտի մեկնարկեն երկաթուղիի եւ մշակութային հատուածի նախագծման աշխատանքները:
Քննարկումներու ծիրին մէջվարչապետը համապատասխան յանձնարարականներ տուած է պատասխանատուներուն՝ նախագիծի իրականացման առնչուող տարբեր հարցերու վերաբերեալ:
