Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնի մէջ ընդունեց Հայաստանի Հանրապետութեան մէջ Աւստրալիոյ արտակարգ եւ լիազօր դեսպան Ճոն Կիրինկը (նստավայրը՝ Մոսկուա)։
Հանդիպման ընթացքին Նորին Սրբութիւնը անդրադարձ կատարեց Հայաստանի առջեւ ծառացած անվտանգային մարտահրաւէրներուն՝ շնորհակալութեամբ ընդգծելով, որ Աւստրալիան մշտապէս զօրավիգ եղած է հայ ժողովուրդին, նաեւ դժուարին այս շրջանին իր կարեւոր աջակցութիւնը բերած է հայրենազրկուած արցախահայութեան։
Վեհափառ Հայրապետը իր գնահատանքը յայտնեց Աւստրալիոյ իշխանութիւններուն հայ համայնքին հանդէպ դրսեւորուող հոգատար վերաբերմունքին առնչութեամբ, ինչին ականատեսը եղած է հովուապետական այցերու ընթացքին:
Դեսպան Ճոն Կիրինկը հաւաստիացուց Նորին Սրբութեան, որ իր պաշտօնավարման ընթացքին հնարաւոր բոլոր ջանքերը պիտի գործադրէ երկկողմ կապերու ամրապնդման եւ խորացման համար: Դեսպանը շեշտեց նաեւ Աւստրալիոյ մէջ յաջողութիւններ արձանագրած հայ համայնքի կեանքին մէջ Հայոց Եկեղեցւոյ կարեւոր առաքելութիւնը:
Զրոյցի ընթացքին խօսուեցաւ բռնի տեղահանուած արցախցիներու եւ պատանդառուած ռազմագերիներու իրաւունքներու պաշտպանութեան, Արցախի հոգեւոր-մշակութային ժառանգութեան պահպանութեան առնչուած խնդիրներու, ինչպէս եւ Եկեղեցւոյ կողմէ իրականացուող ընկերային աջակցութեան ծրագրերու մասին:
