Ինչպէս որ կը կանխատեսուէր եւ անդրադարձած էին մեր հարցախոյզ նախկին յօդուածին մէջ, Թուրքիոյ նախագահ, միջազգային ոճրագործ եւ ոճրապետ Ալիեւի, «Տաէշ»-ի կնքահայր Ռեճեպ Թայիպ Էրտողանի «ԱՔ» կուսակցութիւնը խայտառակ պարտութիւն կրեց Մարտ 31-ին Թուրքիոյ ամբողջ տարածքին կայացած քաղաքապետական ընտրութիւններուն:
Անցեալ տարի Թուրքիոյ նախագահ վերստին ընտրուած Էրտողան, որ Սեւ ծովու Ռիզա քաղաքէն կրօնափոխ վրացիի եւ լազի զաւակ է եւ շուրջ 20 տարիէ որպէս բռնապետ եւ մեծ տէրութիւններու «սեւ» գործերը կարգաւորող հլու կամակատար, այս անգամ կորսնցուց երկրէն գլխաւոր քաղաքներուն եւ արեւելեան նահանգներուն մէջ ժողովուրդներու վստահութեան քուէներուն մեծամասնութիւնը:
Առաջին շառաչուն ապտակը Իսթամպուլ-Պոլիսէն էր, երբ ընդդիմադիր քեմալիստ կուսակցութեան քաղաքապետ Էքրէմ Իմամօղլու մրցավազքը շահեցաւ աւելի քան մէկ միլիոն ձայներու տարբերութեամբ: Իմամօղլու Պոնտոսի կրօնափոխներէն է եւ գլխաւոր թեկնածուն է այսօր, Էրտողանի դէմ Թուրքիոյ նախագահական ընտրութիւններուն:
Մինչ մայրաքաղաք Անգարայի մէջ, «HP»-ի քաղաքապետ Մանսուր Եավաշ դարձեալ ընտրուեցաւ իր պաշտօնին: Ընդդիմութիւնը աւելի քան 19 քաղաքապետական տարածքներու մէջ յաղթանակ տօնեց, 35 տարուան մէջ առաջին անգամ ըլլալով մէկ տոկոսով յառաջ անցնելով իշխանութեան տիրացած AKP թեկնածուներէն: Իսկ հարաւարեւելեան նահանգներուն մէջ, որուն քաղաքապետերէն շատեր, որպէս HDP-ի քրտամէտ, իբր թէ «ահաբեկիչ» շրջանակներու անդամ, այս անգամ նորաստեղծ DEM կուսակցութեան դրօշին ներքոյ՝ 10 քաղաքապետական շրջաններու մէջ յաղթանակ տարին, օգտուելով տնտեսական քայքայման, ներքին եւ արտաքին երեւակայածին «թշնամիներ»-ու դէմ էրտողանեան վարչակարգին սանձազերկած ձերբակալութիւններու, սպանութեանց, սարսափի եւ վախի մթնոլորտ ստեղծելու, Իրաքի եւ Սուրիոյ քրտական շրջանները ռմբակոծելու, տարածքներ զաւթելու, թուրքիան իսլամական պետութեան արիւնախումներու կեդրոն դարձնելու, մինչեւ միջամտելու հայ-ատրպէյճանական եւ արցախեան պատերազմի հարցերու մէջ:
Վերոյիշեալ բոլոր ոճրապետերը, շատ լաւ կը հասկնան, որ Թուրքիոյ ժողովուրդները, նոյնիսկ լուսաւորեալ եւ զարգացած թուրք, քիւրտ, ասորի, հայ, կրօնափոխ պոնտոսցի, համշէնահայ, չերքէզ, չեչեն եւ այլ շրջանակներ, արդէն յոգնած են Էրտողանէն եւ անոր անվերջանալի արկածախնդրութիւններէն, որոնք հսկայական հարստութիւն, թալան ու միլիառներու կաշառք նուիրաբերեցին «սուլթան» Էրտողանին եւ իր շրջապատին, որոնց գլխաւոր ժամանցներէն մէկն ալ Յովհաննէս Այվազովսքիի հրաշալի ստեղծագործութիւնները թալանելն ու սեփականացնելն է:
Մեզի կը մնայ քիչ մըն ալ համբերել, որպէսզի տեսնենք լրիւ «որբացած», Իլհամ Ալիեւին նոյնանման ճակատագրին արժանանալը:
ՀԱՄՕ ՄՈՍԿՈՖԵԱՆ
