Լեռնային Ղարաբաղի նախկին պետական նախարար Ռուբէն Վարդանեանը իր բարեգործական եւ մարդասիրական գործունէութեան համար ներկայացուած է 2024 թուականի Խաղաղութեան Նոպէլեան մրցանակի:
Հեղինակաւոր անձերու կողմէ Ռուբէն Վարդանեանը ներկայացուած է այդ բարձր մրցանակին՝ շուրջ հինգ տասնեակի հասնող նոր եւ աննախադէպ կրթական, բարեգործական, գիտական եւ մարդասիրական կառոյցներու ստեղծման ու օժանդակման համար ոչ միայն Հայաստանի, այլեւ շարք մը երկիրներու մէջ:
«Առաջադրողները տպաւորիչ եւ միջազգային գնահատականի արժանի համարած են Ռուբէն Վարդանեանի՝ մարդասէրի եւ բարերարի կերպարը եւ անոր հետեւողական ջանքերը՝ ուղղուած նոյնիսկ պատերազմներու եւ անոնց սպառնալիքի, ֆինանսական եւ քաղաքական ճգնաժամերու ընթացքին մարդասիրական, բարեգործական ու ընկերային ծրագրերու միջոցով երկարատեւ կայունութեան ու զարգացման գործիքներու ներդրման:
Այդ ծիրին մէջ մասնաւորապէս յիշատակուած է անոր գործունէութիւնը շրջափակուած Արցախի մէջ, ուր Ռուբէն Վարդանեանը մեծ ջանքեր ներդրած է՝ փորձելով ոչ միայն մեղմել մարդասիրական ծանր կարիքները, այլեւ դժուարին վիճակի մէջ յայտնուած մարդոց ու երեխաներու կենսական պայմաններու բարելաւման հնարաւորութիւններ ստեղծել:
Գնահատելի համարուած է այն, որ Ռուբէն Վարդանեանի բարեգործութիւնը կ՛ընդգրկէ ոչ միայն ազգային, այլեւ միջազգային մակարդակները եւ համաշխարհային ազդեցութիւն ու նշանակութիւն ունի: Անոր հեղինակային մեծ նախագիծերէն մէկը՝ «Աւրորա» մարդասիրական նախաձեռնութիւնը ուղղուած է աշխարհի բոլոր անկիւններուն, բոլոր ցամաքամասերուն մէջ օգնելու եւ ձեռք մեկնելու բոլոր անոնց, որոնք վտանգելով սեփական կեանքը բարիք կը գործեն: Վարդանեանին առաջադրման ներկայացուած յարգարժան անձերու նամակին մէջ կարեւոր կը համարուի նաեւ այն, որ ան յարգալից եղած է ոչ միայն իր ժողովուրդին, կրօնին, այլեւ այլոց ժառանգութեան նկատմամբ. որպէս անոր վառ օրինակ կը նշուի Ռուբէն Վարդանեանի նախաձեռնութեամբ վերանորոգուած Շուշիի իրանեան մզկիթը:
