Հըզպալլայի ընդհանուր քարտուղար սայիտ Հասան Նասրալլա յայտնեց, որ Իրան իրաւունք ունի հակադարձելու իր զինուորական ղեկավարներէն Մոհամմատ Ռիտա Զահիտիի սպանութեան, որ տեղի ունեցաւ Դամասկոսի ուղղութեամբ ենթադրաբար իսրայէլեան յարձակումի հետեւանքով: Զահիտիի եւ ընկերակիցներուն ահաբեկումի յիշատակին նուիրուած հաւաքի մը ընթացքին, Նասրալլա Դամասկոսի մէջ Իրանի հիւպատոսարանին թիրախաւորումը համարեց երկար տարիներէ ի վեր Սուրիոյ մէջ մեծագոյն գործողութիւնը եւ բնական համարեց, որ Թեհրան ուժգին հակադարձէ: Հըզպալլայի ընդհանուր քարտուղարը ապա ներկայացուց Լիբանանի մէջ Իրանի յեղափոխական պահակագունդի ներկայութեան պատմականը եւ դիտել տուաւ, որ նպատակն էր աշխուժացնել ժողովրդային դիմադրութիւնը, իսկ Զահիտի Դամասկոսի եւ Լիբանանի մէջ կը գործէր ահաբեկուած հրամանատար Քասէմ Սուլէյմանիի որոշումով: «Այս հարուածը նոր զարգացում կը համարուի երկու առումով. նախ պարզապէս իրանցի ղեկավարներու ահաբեկում չէր, այլ հարուածը ուղղակի Իրանի դէմ էր, նկատի առնելով որ հիւպատոսարանը կը համարուի Իրանի հող, իսկ երկրորդ՝ ահաբեկումի մակարդակը բարձր էր, որովհետեւ թիրախաւորուեցաւ Լիբանանի եւ Սուրիոյ մէջ իրանցի զինուորական խորհրդականներուն ղեկավարը», ըսաւ Նասրալլա՝ աւելցնելով, որ Իսրայէլ, Միացեալ Նահանգներ ու համայն աշխարհը համոզուած են, որ Իրան անպայման պիտի հակադարձէ:
Խօսելով Կազայի զարգացումներուն մասին, Հըզպալլայի ընդհանուր քարտուղարը նշեց, որ պատերազմի սկիզբէն վեց ամիս ետք, Իսրայէլ ոչ միայն որեւէ իրագործումի չէ հասած, այլ կը դիմագրաւէ յաւելեալ խնդիրներ եւ իսրայէլացիներուն մեծամասնութիւնն իսկ գոհ չէ զարգացումներով:
Նասրալլա անդրադարձաւ նաեւ Լիբանանեան ուժեր կուսակցութեան Ժըպէյլ գաւառի համակարգող Փասքալ Սլէյմանի առեւանգումին եւ բուռն քննադատեց նշեալ կուսակցութեան եւ Փաղանգաւոր կուսակցութեան յայտարարութիւնները: «Անոնք իրաւատէր չեն, այլ՝ քաղաքացիական պատերազմ որոնողներ: Աստուած Լիբանանը պահպանեց ներքին խռովութիւններու վտանգէն, որ յառաջացած էր ոխի եւ դաւադրական ծրագրերու պատճառով», ըսաւ Նասրալլա՝ խօսելով Սլէյմանի առեւանգումէն ետք իր կուսակցութեան ուղղուած ամբաստանութիւններուն, Ժըպէյլ գաւառին մէջ ճամբաներու փակումին եւ շրջանի բնակիչներու ուղղուած սպառնալիքներուն մասին:
