Հայաստանի Հանրապետութեան Արտաքին գործերի նախարարութեան խօսնակ Անի Պատալեան յայտնած է, որ Հայաստան կը կարեւորէ Ֆրանսայի ներդրումը Հարաւային Կովկասի մէջ խաղաղութեան հաստատման ճանապարհին:
Այս մասին ան յայտարարած է` ի պատասխան լրատուամիջոցներէն ստացուած հարցումներուն:
– 2 Ապրիլին Ֆրանսայի Եւրոպայի եւ արտաքին գործերու նախարար Սթեֆան Սեժուրնէն ԱՄՆ արտաքին գործերու նախարար Անթընի Պլինքընի հետ համատեղ մամուլի ասուլիսի ժամանակ անդրադարձաւ Հարաւային Կովկասի մէջ կայունութեան ապահովման անհրաժեշտութեանն ու զարգացումներուն, սրացումէ խուսափելու Հայաստանի իրական մտադրութեան` նաեւ մտահոգութիւն յայտնելով ՀՀ տարածքային ամբողջականութեան նկատմամբ հնարաւոր սպառնալիքներու առնչութեամբ: Որոշ երկիրներ Ֆրանսայի այս ընկալումը օգտակար չեն համարեր տարածաշրջանային կայունութեան տեսանկիւնէն: Ինչպէ՞ս կը մեկնաբանէք:
Կը կարծենք, որ Ֆրանսայի արտաքին գործերու նախարարին 2 Ապրիլի անդրադարձը եւ տարածաշրջանին մէջ խաղաղութեան հաստատման ճանապարհին Ֆրանսայի ներգրաւուածութեան նպատակներն ու կարեւոր ներդրումը յայտնի են բոլոր գործընկերներուն: Անոր օրինակները շատ են թէ՛ Հայաստանի հետ երկկողմ, թէ՛ տարածաշրջանային ու բազմակողմ հարթակներու մէջ փոխգործակցութեան առումով:
Քննարկուող ծիրին մէջ կրնանք առանձնայատուկ նշել 2022-ի Հոկտեմբերին Փրակի մէջ Եւրոպական քաղաքական համայնքի շրջանակներուն մէջ կայացած քառակողմ հանդիպումը, որուն ժամանակ Հայաստանի եւ Ատրպէյճանի ղեկավարները վերահաստատեցին իրենց հաւատարմութիւնը 1991-ի Ալմա-աթայի հռչակագրին. ի դէպ, Փրակի հանդիպման եւ Ալմա-աթայի հռչակագրի մասին կը յիշատակուի նաեւ ԱՄՆ արտաքին գործերու նախարար Անթընի Պլինքընի հետ կայացած հեռախօսազրոյցին վերաբերեալ Ատրպէյճանի նախագահի աշխատակազմին կողմէ տարածուած հաղորդագրութեան մէջ:
Մենք կը կարեւորենք, ի հարկէ, Ֆրանսայի ներդրումը նաեւ որպէս Եւրոպական միութեան անդամ, որուն առաքելութիւնը 2022-ի Հոկտեմբերէն` նոյն Փրակի հանդիպումէն յետոյ կը մշտադիտարկէ Հայաստանի եւ Ատրպէյճանի միջեւ միջպետական սահմանը եւ վերջին օրերուն ալ հանդէս եկած է համապատասխան հաղորդագրութիւններով: Կը կարծենք` ԵՄ առաքելութեան մանտաթին համապատասխան գործունէութիւնն ու գնահատականները պէտք է հաշուի առնուեն, այդ շարքին` ԵՄ բոլոր անդամ պետութիւններու դիրքորոշումներուն մէջ:
