Ուժանիւթի եւ ջուրի հարցերու նախարարի պաշտօնակատար Ուալիտ Ֆայյատ նշեց, որ ուժանիւթային հարցերով ամերիկացի յատուկ պատուիրակ Ամուս Հոքշթայն հետաքրքրուած է հարաւային ճակատի հանդարտութեամբ եւ կը նշէ, որ Եգիպտոսէն կազի փոխադրութիւնը եւ ծովային պաշարներու որոնումները կախեալ են սահմանային կայունութենէն, ուստի որեւէ աշխատանք կարելի չէ կատարել զինեալ բախումներու լոյսին տակ: Նախարարի պաշտօնակատարը Լիբանանի յանձնառութիւնը յայտնեց նաեւ Իրաքի հետ ուժանիւթային համաձայնութեան գործադրութեան եւ կոչ ուղղեց երկարաձգելու անոր գործադրութեան ժամկէտը:
«Ուժեղ Հանրապետութիւնը» խորհրդարանական խմբակցութեան անդամ, երեսփոխան Ղասսան Հասպանի դրուատեց քանի մը օր առաջ Աշրաֆիէի մէջ տեղի ունեցած անարգ ոճիրին առնչութեամբ կասկածելիներու ձերբակալութիւնը եւ ծալքերու բացայայտումը լիբանանեան բանակի հետախուզական ծառայութիւններու արագ արձագանգին շնորհիւ: Հասպանի դատական մարմիններէն պահանջեց խստիւ պատժել յանցագործները, իսկ ապահովական կառոյցներուն կոչ ուղղեց յաւելեալ ջանք թափելու՝ կանխելու համար նման միջադէպերու կրկնութիւնը:
