Հայաստանի մէջ աշխատանքի ընդունուած են Լեռնային Ղարաբաղէն բռնի տեղահանուած բաւականին մեծ թիւով անձեր։
Կառավարութեան նիստին այս մասին ըսաւ վարչապետ Նիկոլ Փաշինեանը։
«Պէտք է արձանագրենք, որ այս ընթացքին Լեռնային Ղարաբաղէն բռնի տեղահանուած բաւականին մեծ թիւով մեր քոյրեր եւ եղբայրներ Հայաստանի մէջ աշխատանքի ընդունուած են։
Վերջին տուեալներուն համաձայն՝ Լեռնային Ղարաբաղէն բռնի տեղահանուած եւ Հայաստանի մէջ աշխատանքի ընդունուած անձերուն թիւը կ’անցնի 11 հազար 800-էն։ Մենք այս գործընթացը պէտք է քաջալերենք», ըսաւ Փաշինեան։
Կառավարութեան ղեկավարին խօսքով՝ Լեռնային Ղարաբաղէն բռնի տեղահանուած դպրոցահասակ տարիքի գրեթէ բոլոր երեխաները տեղաւորուած են Հայաստանի դպրոցներուն մէջ։
