Հաւաքական անվտանգութեան պայմանագրի կազմակերպութեան գլխաւոր քարտուղարը յայտնած է, որ Հայաստանը կը մնայ կազմակերպութեան դաշնակիցը եւ միեւնոյն ժամանակ յաւելած, որ ՀԱՊԿ-ը Հայաստանի ղեկավարութեան կողմէ քաղաքական սթափութիւն կ’ակնկալէ։
ՀԱՊԿ գլխաւոր քարտուղար Իմանղալի Թասմաղամպեթովը նման կարծիք յայտնած է «Նացիոնալնայա Օպորոնա» ամսագրին տուած հարցազրոյցին մէջ։
«Մենք Հայաստանի ղեկավարութեան կողմէ կ’ակնկալենք քաղաքական սթափութիւն եւ կազմակերպութեան հետ կապուած տարբեր բնագրերու իրականացման հեռանկարներու հաւասարակշռուած գնահատական։ Ընդգծեմ, որ Հայաստանը կը մնայ մեր դաշնակիցը, գործող բոլոր պարտաւորութիւնները կը մնան ուժի մէջ», նշած է քարտուղարը՝ անդրադառնալով հարցին, թէ արդեօք ՀԱՊԿ-ի մէջ կը սպասե՞ն կազմակերպութեան անդամակցութեան դադրեցման վերաբերեալ Հայաստանի կողմէ յայտարարութեան։
Իմանղալի Թասմաղամպեթով յաւելած է, որ ինչպէս ինքը, այնպէս ալ քարտուղարութիւնը կ’աշխատին կազմակերպութիւնում ընդունուած կանոնակարգերուն եւ ընթացակարգերուն համապատասխան։
«Մենք, բնականաբար, մեր վերլուծաբաններուն եւ անոնց հասանելի գործիքակազմին ուժերով կը վերլուծենք իրավիճակը Հայաստանի շուրջ եւ իրավիճակը Հայաստանի ու կազմակերպութեան փոխյարաբերութիւններուն մէջ», ըսած է Թասմաղամպեթով։
