Տնտեսական առումով, Լիբանան աշխարհի երրորդ թշուարագոյն երկիրն է: Անցնող օրերուն հրապարակուեցաւ թշուարութեան համաշխարհային «Hanke» աղիւսակը, որ թշուառութեան ցուցանիշերը կը վերլուծէ 1969 թուականէն ի վեր: Ըստ վերջերս հրապարակուած 2023-ի աղիւսակին, աշխարհի թշուառագոյն երկիրն է Արժանթինը՝ մասնաւորաբար ուռճացումի ահաւոր մակարդակին պատճառով: Թշուառներու երկրորդ դիրքին վրայ է Արժանթինի լատինամերիկեան հարեւան Վենեզուելան՝ նոյն պատճառով: Երրորդ եւ չորրորդ դիրքերը կը գրաւեն միջինարեւելեան հարեւաններ Լիբանանն ու Սուրիան՝ նոյնպէս ուռճացումի պատճառով, այդպիսով գրաւելով արաբական աշխարհին վատագոյն երկու դիրքերը: Համաշխարհային վատագոյն հնգեակը կ’ամբողջացնէ ափրիկեան Զիմպապուէն: 157 երկիրներու շարքին, լաւագոյն դիրքին վրայ է Թայլէնտը, որուն կը յաջորդեն Ճափոնը, Զուիցերիան, Քաթարը եւ Մալթան: Հայաստանը աշխարհի 74-րդ թշուառն է, Ատրպէյճան՝ 79-րդը, Վրաստան՝ 47-րդը, Թուրքիա՝ 7-րդը, Ռուսիա՝ 97-րդը, Միացեալ Թագաւորութիւն 107-րդը, Միացեալ Նահանգներ 132-րդը, իսկ Իսրայէլ՝ 133-րդը: Տնտեսական թշուառութեան գլխաւոր պատճառն է սակագիներու ուռճացումը, ապա գործազրկութեան համեմատութիւնն ու վարկերուն տոկոսները: