Հայաստանի վարչապետ Նիկոլ Փաշինեան երէկ անակնկալօրէն այցելեց հիւսիսարեւելեան Տաւուշ գաւառի սահմանային Ոսկեպար գիւղ, ուր դպրոցի սրահին մէջ գաւառապետին ընկերակցութեամբ տեսակցած է շրջանի բնակավայրերու ներկայացուցիչներուն հետ: Ըստ ոչ-պաշտօնական տեղեկութիւններուն, Փաշինեան քննարկած է Ատրպէյճանի հետ սահմանագծումի նիւթը, Պաքուի պահանջները եւ սահմանային այլ հարցեր: Ընդդիմադիր գործիչներ շուտով յայտարարեցին, թէ Փաշինեան Տաւուշ ուղղուած էր շարք մը գիւղերու տարածքներ Ատրպէյճանին յանձնելու մասին խօսելու համար: Ըստ ընդդիմադիրներուն, Փաշինեան զգուշացուցած է, թէ այլընտրանքը պատերազմն է, յիշեցնելով որ Ատրպէյճանի կողքին է Թուրքիան: Նշենք, որ հանդիպումը տեղի ունեցած է լրատուամիջոցներէն հեռու:
