Իսրայէլեան բանակը երէկ վերստին լայնածաւալ յարձակում գործեց Կազայի մէջ գործող բժշկական գլխաւոր կեդրոնին՝ «Շիֆա» հիւանդանոցային համալիրին վրայ՝ զինեալներ որոնելու պատճառաբանութեամբ: Բանակի բանբեր Ավիխայ Ատրահի յայտնեց, որ բանակն ու հետախուզական «Շապաք» ծառայութեան աշխատակիցները ներխուժած են հիւանդանոցը՝ գտնելու եւ ձերբակալելու համար շարք մը զինեալներ, որոնք այդ համալիրին մէջ կը մշակեն նոր յարձակումներու ծրագրեր: Իսրայէլեան գործողութեան ընթացքին եղան ձերբակալութիւններ եւ հրաձգութեան փոխանակում: Բանակը յայտարարեց, թէ հիւանդանոցին մէջ սպաննած է Համասի կառավարութեան ներքին ապահովութեան ուժերու գործողութիւններու պատասխանատուն: Պաղեստինեան լրատու գործակալութիւնը հաղորդեց, որ «Շիֆա» հիւանդանոցին վրայ կատարուած յարձակումին հետեւանքով զոհուած կամ վիրաւորուած են քանի մը տասնեակ պաղեստինցիներ: Գործողութեան ընթացքին իսրայէլացի զինուորներ բռնութիւն գործադրելով ձերբակալեցին «Ժազիրա» ցանցի լրագրողը եւ կործանեցին հեռասփռումի սարքերը:
