Պէյրութի միջազգային օդակայանին մէջ ճամպրուկներու եւ բեռներու մանրազննում կատարող ներքին ապահովութեան ուժերու գրասենեակը յաջողեցաւ խափանել շուրջ 10 քիլոկրամ թմրախոտ մաքսանենգելու փորձ մը: Ըստ տեղեկութիւններուն, արգիլուած նիւթը գտնուած է ուքրանացի կնոջ մը մօտ, որ կը փորձէր բեռը հասցնել Արաբական Միացեալ Էմիրութիւններ: Իսկ դատական ոստիկանութեան, Պէյրութի գրասենեակը յայտարարեց, թէ մայրաքաղաքի Թարիք Ժտիտէ շրջանին մէջ ձերբակալած է 1989-ի ծնունդ լիբանանցի Մ. Մ.-ն՝ թմրանիւթերու վաճառականութեամբ զբաղելու յանցանքով: Ձերբակալութեան պահուն անոր մօտ գտնուած են զանազան տեսակի թմրանիւթեր, որ ան շարժանիւով կը փորձէր վաճառել:
