Լիբանանեան քաղաքական ճգնաժամը լուծելու եւ հանրապետութեան նոր նախագահ ընտրելու ջանքերուն ծիրին մէջ, խորհրդարանի նախագահ Նեպիհ Պըրրի երէկ ընդունեց Լիբանանի հարցով զբաղող միջազգային հնգեակին մաս կազմող պետութիւններուն՝ Միացեալ Նահանգներու, Ֆրանսայի, Քաթարի, Եգիպտոսի եււ Սէուտական Արաբիոյ դեսպանները:
Հինգ դեսպանները տեսակցեցան նաեւ մարոնիներու պատրիարք Պըշարա Ռահի կարտինալին հետ ու անոր ներկայացուցին նոր նախագահի ընտրութեան հարցով յառջորդ փուլին իրենց ձեռնարկելիք քայլերուն ընդհանուր պատկերը: Եգիպտոսի դեսպան Ալաա Մուսա խիստ կարեւոր համարեց պատրիարքին հետ տեսակցութիւնը, աւելցնելով որ իրենց քայլերը որոշուած են քաղաքական ղեկավարութիւններուն եւ երեսփոխանական համախմբումներուն հետ խորհրդակցութիւններու լոյսին տակ: «Վերջին շրջանին շօշափեցինք դրական նշաններ, որ պիտի գործածենք՝ նոր նախագահի ընտրութեան յարմար միջավայր ստեղծելու համար», ըսաւ դեսպանը:
