ԼԻԲԱՆԱՆԻ 85-ԱՄԵԱՅ «ԱՐԱՐԱՏ» ՕՐԱԹԵՐԹՆ ԱՇԽԱՏՈՒՄ Է՝ ԱՆԿԱԽ ԼԻԲԱՆԱՆԵԱՆ ԽՆԴԻՐՆԵՐԻՑ.
Լիբանանի 85-ամեայ «Արարատ» օրաթերթն այսօր ունի գոյատեւման լուրջ խնդիր, ինչպէս Լիբանանի շատ պարբերականներ, քանի որ երկրի տնտեսական բազմաթիւ խնդիրները խոչընդոտում եւ բարդութիւններ են առաջացնում ոչ միայն այդ երկրի բնակիչների, տարբեր ոլորտների, այլ նաեւ լրատուական աշխատանքի համար:
«Հայկական սփիւռքի «սիրտ» հանդիսացող լիբանանահայութեան մարտահրաւէրները այսօր բազմաթիւ են», կ՛ըսէ Լիբանանի «Արարատ» օրաթերթի պատասխանատու Անի Եփրեմեանը:
«Լիբանանեան տնտեսական ու քաղաքական խնդիրները վատ ազդեցութիւն են ունեցել ոչ միայն այդ երկրի բնակիչների կեանքի որակի վրայ, այլեւ նպաստել են հայկական համայնքի նօսրացմանը», կ՛ըսէ Անի Եփրեմեանը եւ աւելացնում, որ դա լուրջ ազդեցութիւն է ունեցել նոր սերնդի վրայ: Նրանցից շատերը լքում են Լիբանանը եւ իրենց կեանքն ու ապագան կառուցում այլ երկրներում՝ ասում է թերթի տնօրէնը։
Ինչո՞ւ են երիտասարդ լիբանանահայերը լքում երկիրը եւ արդեօ՞ք նրանք հաստատւում են Հայաստանում։ «Շատերն իմ շրջապատից, այո՛, Հայաստանն են նախընտրել: Նրանք իրանց աւելի լաւ են զգում Հայաստանում եւ փորձում են աշխատել ու ապրել հայաստանեան կեանքով»,կ՛ըսէ Եփրեմեանը:
Ինչ վերաբերում է Հայաստան-Սփիւռք յարաբերութիւններին, նա հետեւեալ կարծիքն ունի. «Նախկինում շատ միջոցառումներ ու հանդիպումներ էին կազմակերպւում մեզ միաւորելու համար, այսօր, սակայն, դրանք նուազել են: Բայց մեր խնդիրը ոչ թէ կառավարություններն են ու անհատները, այլ մեր հայրենիքի բարօրութիւնն ու ապագան: Դրա համար մեզանից իւրաքանչիւրը պէտք է աշխատի ու մի կողմ դնելով սեփական համոզմունքները՝ օգնի մեր հայրենիքին:
Լիբանանում խնդիրները բազմաթիւ են ու անվերջանալի՝ ցաւով նշում է «Արարատ»-ի պատասխանատուն, սակայն թէ՛ պարբերականներն են գոյատեւում, թէ՛ մշակութային ու համայնքային կեանքն է աշխոյժ։
