Եւրոպական միութեան Արտաքին քաղաքական ծառայութեան ներկայացուցիչ Փիթըր Սթանօն յայտնած է, որ Հայաստանը՝ ինչպէս իւրաքանչիւր եւրոպական երկիր, իրաւունք ունի դիմելու Եւրոմիութեան անդամակցելու համար։
«Երկիրները իրաւունք ունին ձգտելու իրենց ժողովուրդին համար աւելի լաւ ապագայի։ Անոնք ազատ են որոշելու, թէ ինչպէս ապահովել նման ապագայ։ Ինչ կը վերաբերի ԵՄ անդամակցութեան, ապա իւրաքանչիւր եւրոպական երկիր՝ իր ժողովուրդն ու կառավարութիւնը, պէտք է որոշէ, թէ արդեօք կ’ուզէ՞ դիմել ԵՄ-ին միանալու համար», նշած է Սթանօն՝ ի պատասխան այն հարցումին, թէ արդեօք Եւրոմիութեան դռները բա՞ց են Հայաստանի համար:
Ան յիշեցուցած է, որ այն պարագային, երբ այս կամ այն երկիրը Եւրոպական միութեան անդամակցելու համար դիմում կը ներկայացնէ, այն կը դիտարկուի կազմակերպութեան անդամ երկիրներու կողմէ, որմէ յետոյ վերջիններս համապատասխան որոշում կը կայացնեն՝ հիմնուելով «ԵՄ պայմանագրերու եւ սահմանուած չափանիշերուն վրայ»։
