24 Փետրուար 2024-ին, Փասատինայի ՀԿԲՄ-ի սրահէն ներս տեղի ունեցած մեծարանքի շքեղ ճաշկերոյթևհանդիսութեան մը ընթացքին, ՍԴ Հնչակեան Կուսակցութեան խումբ մը անդամներ պարգեւատրուեցան «Փարամազ»ի անուան շքանշանով:
Ներկայ էին միջոցառման հովանաւոր` ՍԴՀԿ-ի Կեդրոնական վարչութեան ատենապետ` Տէր եւ Տիկ. Ընկ. Տօքթ. Համբիկ Սարաֆեան, ինչպէս նաեւ Կեդրոնական վարչութեան այլ անդամներ, ՍԴՀԿ Արեւմտեան Ամերիկայի Վարիչ Մամինի ատենապետ` Տէր եւ Տիկին Ընկ. Վազգէն Խոտանեան, ենթակառոյցներու ղեկավարներ եւ մեծ թիւով կուսակցականեր ու համակիրներ:
Երեկոյթի կազմակերպիչ յանձնախումբին անունով օրուան հանդիսավարներէն` Ծովիկ Քէօրողլեան, բարի գալուստի ջերմ խօսքերով ողջունեց սոյն յիշարժան ձեռնարկին մասնակիցները եւ պարզեց հաւաքին նպատակը, որն է` գնահատել գաղափարանուէր վաստակաշատ ընկերներու օգտաշատ ծառայութիւններն ու ներդրումը ի նպաստ կուսակցութեան ազգանուէր առաջադրանքներու իրագործումին: