Համաշխարհային Սուրիանի Միութիւն կուսակցութեան պատուիրակութիւնը գլխաւորութեամբ նախագահ Իպրահիմ Մրատի, փոխնախագահ Լէյլա Լաթթիի, ներքին գործերու Մեթնի համակարգող Ժոզէֆ Հաժարի եւ քաղաքական գրասենեակի անդամ Պէյրութի շրջանի համակարգող Ժորժ Ժարպաքայի, այցելեց Սոցիալ Դեմոկրատ Հնչակեան Կուսակցութեան կեդրոն: Անոնք ընդունուեցան Ս.Դ.Հ.Կ. Լիբանանի Վարիչ մարմինի ատենապետ Վանիկ Տագէսեանի, անդամներ Միհրան Շահինեանի, Լութֆիկ Կոտալազեանի եւ Ս.Դ.Հ.Կ. Կեդրոնական վարչութեան անդամ Ալեքս Քէօշկէրեանի կողմէ:
Ժողովի օրակարգին հիմնական նիւթերէն մէկն էր հայ եւ սուրիանի ժողովուրդնեդու պատմական յարաբերութիւնը եւ ամուր դաշինքը: Ուսումնասիրուեցան Լիբանանի ներքին ու շրջանի հարցերը, յատկապէս հարաւային Լիբանանի մէջ վիճակը ու սպառնալիքը ամբողջ Լիբանանին: Օրակարգի նիւթ էր նաեւ Լիբանանի ներքին վիճակը, մանաւանդ վարչակարգի տագնապը կեդրոնական պետական համակարգի տկարացումին պատճառով: Այս պետական համակարգը ցոյց տուաւ իր ձախողութիւնը: Կրօնական բազմազանութեան վրայ հիմնուած պետութիւններ յաջողած չեն: Նախագահ Մրատ շեշտեց պետութեան գերիշխանութեան խախտումին պատճառով այսօրուան վիճակին հասնիլը: Միջազգային որոշումներու գործադրութիւնը, յատկապէս 1559 որոշումին, միակ լուծումն է այս վիճակէն դուրս ելլելու: Նաեւ դաշնային պետութիւն հաստատելը կը քաջալերէ համակեցութիւնը եւ կը գործադրէ բոլոր խաւերու ձգտումները, կը պահպանէ անոնց մշակութային բազմազանութիւնը եւ Լիբանանը կը վերադարձնէ իր նախկին բարգաւաճ վիճակին:
Աւարտին, օրակարգի նիւթ դարձաւ հայ եւ սուրիանի ժողովուրդներու եւ Արեւելքի քրիստոնեայ ժողովուրդներու կրած տառապանքը: Այս տարի Սուրիանի Միութիւն Կուսակցութիւնը ցեղասպանութեան իր ոգեկոչումը պիտի կատարէ 20 Ապրիլին:
