Հայաստանի վարչապետ Նիկոլ Փաշինեանի կարծիքով` աշխարհաքաղաքական դերակատարները պէտք է չէզոք ըլլան, հակառակ պաարգային չեն կրնար կառուցողական դերակատարում ունենալ հայ-ատրպէյճանական կարգաւորման գործընթացին մէջ:
Այս մասին Փաշինեան ըսաւ ասուլիսի ընթացքին` պատասխանելով հարցումին, թէ արդեօք Արեւմուտքի կողմէ Թուրքիոյ հայ-ատրպէյճանական կարգաւորման գործընթացի մէջ ներգրաւելու միտում կը նկատուի:
«Ինչ կը վերաբերի Հայաստան-Ատրպէյճան յարաբերութիւններուն, ապա կը կարծեմ` ճիշդ բանաձեւը եւ ձեւակերպումը այն է, որ դերակատարները պէտք է չէզոք ըլլան, որպէսզի այդտեղ կառուցողական դերակատարում ունենան», նկատեց Փաշինեան:
Անդրադառնալով տարածաշրջանին եւ համաշխարհային ասպարէզին մէջ Թուրքիոյ ունեցած դերին` վարչապետը ընդգծեց. «Իրականութիւնը այն է, որ Թուրքիոյ ներկայութիւնը ե՛ւ կը տեսնենք, ե՛ւ կը զգանք»:
Հայաստանի վարչապետին դիտարկմամբ` Հայաստանը պէտք է ունենայ օրակարգ Թուրքիոյ հետ եւ ընկալէ ոչ թէ Ատրպէյճանի միջոցով, այլ դիտէ որպէս սահմանակից դրացի. պէտք է առերեսուիլ այն փաստին հետ, որ Թուրքիան նաեւ միջազգային մեծ դերակատարութիւն ունի:
Վարչապետը նշեց, որ Թուրքիոյ ղեկավարին եւ այդ երկրի ներկայացուցիչներուն հետ շփումը ոչ միայն տարօրինակ չէ, այլեւ բնական է, քանի որ Թուրքիան ու Հայաստանը հարեւաններ են` յաւելելով, որ արտառոց ու տարօրինակ չէ նաեւ այն, որ երկու երկիրներու ղեկավարները հեռախօսազրոյցներ կ՛ունենան:
«Ես կը կարծեմ, որ Թուրքիոյ հետ մեր յարաբերութիւններուն մէջ կարեւոր բան մը տեղի կ՛ունենայ, որ կրնայ տարօրինակ հնչել, թէ անոր մէջ ի՞նչ կարեւոր բան կայ. մենք կը խօսինք իրար հետ: Ես կը համարեմ, որ Թուրքիոյ նախագահին հետ մենք ունինք խօսակցութիւն եւ երկխօսութիւն, որ շատ բարդ է` հեշտ չէ, բայց շատ կարեւոր է, որ այդ խօսակցութիւնը ըլլայ: Ես կը յիշեմ մեր քննարկումները, ընկալումներն ու զգացողութիւնները, երբ Փրակի մէջ` մինչեւ մեր պաշտօնական հանդիպումը Թուրքիոյ նախագահին հետ, այդ լուսանկարուած եւ համացանցին մէջ յայտնուած էր, կը յիշեմ, թէ այդ լուսանկարը ինչպիսի մեծ դրական, բացասական շփոթ, քննարկում եւ արձագանգ յառաջացուցած էր: Կը յիշեմ նաեւ Հայաստանի մէջ մեր շատ խմբակիցներու լարուածութիւնը անկէ», նշեց Փաշինեան` խօսելով բանակցութիւններու եւ քննարկումներու ընթացքին դժուարութիւններու եւ անոնց յաղթահարման բարդութիւններուն մասին:
Հայաստանի վարչապետը նաեւ յաւելեց, որ հասկնալով, թէ մեր հասարակութեան մօտ գիտակցութեան ինչպիսի նուրբ շերտեր կան, այդուհանդերձ, իրեն համար մեծ ջանք եղած է Թուրքիոյ նախագահի երդմնակալութեան արարողութեանը երթալն ու մասնակցիլը:
