«Երեւան» պատանեկան սիմֆոնիկ նուագախումբը, 10 Յունիսին, համատեղ համերգով հանդէս պիտի գայ մեր ժամանակներու մեծագոյն երաժիշտ Աւկուսթին Հատելիխի հետ: Աշխարհահռչակ ջութակահարը համաձայնած է նուագել պատանի երաժիշտներու հետ:
Երեւանի քաղաքապետարանի լրատուութեան վարչութիւնը յայտնած է, որ մայեսթրօ Էտուարտ Թոփճեանի ղեկավարութեամբ նուագախումբը պիտի կատարէ սիմֆոնիկ երգացանկի բարդագոյն ստեղծագործութիւններ` Պեթհովենի ջութակի համանուագը եւ Չայքովսքիի 4-րդ համանուագը: Նախաձեռնութիւնը երեւանեան մշակութային կեանքին մէջ պիտի առանձնանայ իր բացառիկութեամբ:
