Կ՛ԸՍԷ ՎԱՐՉԱՊԵՏ ՓԱՇԻՆԵԱՆ
Հայաստանի վարչապետ Նիկոլ Փաշինեան յայտնած է, որ այն գիւղերը, որոնք Ատրպէյճանը կը պահանջէ, երբեք չեն եղած Հայաստանի ինքնիշխան տարածքին մէջ:
Փաշինեան, պատասխանելով լրագրողի այն հարցումին, թէ Ատրպէյճանը կը շարունակէ տարածքային պահանջներ ներկայացնել Հայաստանին` պահանջելով հայկական կողմէ իրենց վերադարձնել Տաւուշի մարզի չորս գիւղ, ընդգծեց, որ Հայաստանի տարածքին ատրպէյճանական մամուլին կողմէ բարձրաձայնուող գիւղերու անուններով գիւղեր երբեք չեն եղած ոչ միայն խորհրդային ժամանակներուն, այլեւ անկէ յետոյ:
«Կ՛ըսուի, որ Հայաստանի կառավարութիւնը կը պատրաստուի Տաւուշի մարզի գիւղեր յանձնելու Ատրպէյճանին: Երբեք, որեւէ քննարկման ժամանակ խօսք չէ եղած եւ խօսք չի կրնար ըլլալ Տաւուշի մարզի որեւէ գիւղ յանձնելու մասին», ընդգծեց Փաշինեան:
Նախ, վարչապետը նշեց, որ իր կարծիքով` այդ հարցին շուրջ կայ որոշակի շփոթ, որոշակի թերըմբռնում եւ թիւրըմբռնում` առաջարկելով նախ արձանագրել, թէ ո՞րն է Հայաստանի Հանրապետութիւնը:
«Նախ արձանագրենք, թէ ո՞րն է Հայաստանի Հանրապետութիւնը, որպէսզի այդ արձանագրումէն ելլելով` կարենանք յստակ ձեւակերպել, թէ ո՞ւր, ինչպէ՞ս Ատրպէյճանը ունի տարածքային պահանջներ Հայաստանի նկատմամբ եւ ո՞ւր է, որ, ըստ էութեան չունի կամ հնարաւոր է` չունի տարածքային պահանջներ Հայաստանի նկատմամբ», նշեց Փաշինեան` ներկաներուն ցոյց տալով Հայաստանի հանրապետութեան տարածքը` քարտէզի վրայ եւ ընդգծելով, որ ներգաւառային եւ ոչ-ներգաւառային գիւղերը, որոնք Ատրպէյճանը կը պահանջէ, Հայաստանի ինքնիշխան տարածքին մէջ չեն:
