Հայաստանի եւ Եւրոմիութեան յարաբերութիւնները կը զարգանան, անոնք պէտք է նոր դրսեւորումներ ու արտայայտութիւններ ունենան, եւ այդ արտայայտութիւններէն մէկը կրնայ ըլլալ վիզաներու ազատականացման բանակցութիւններուն մեկնարկը:
Այս մասին ըսաւ վարչապետ Նիկոլ Փաշինեան ասուլիսի ընթացքին:
Վարչապետը յիշեցուց իր յայտարարութիւնը, որ Հայաստանը պատրաստ է ԵՄ-ին ըլլալու այնքան մօտ, որքան ԵՄ-ն հնարաւոր կը համարէ:
«Հիմա մենք պէտք է հասկնանք, թէ ԵՄ-ն ինչքան հնարաւոր կը համարէ: Անկէ յետոյ ընենք հետեւութիւններ: Բայց նաեւ կարեւոր է, թէ Հայաստանի ժողովուրդը որքան հնարաւոր պիտի համարէ: Բայց այս փուլին մենք գործընթացը կը տեսնենք այսպէս` ԵՄ-ի հետ մեր յարաբերութիւնները շատ աշխոյժ են: Եւ հիմա ԵՄ-ն կ՛ըսէ, որ Հայաստանի եւ ԵՄ-ի յարաբերութիւնները երբեք այսքան խոր եւ ամուր չեն եղած: Եւ ես յոյսով եմ, որ յառաջիկային պիտի ունենանք քանի մը որոշումներ, որոնք պիտի ըլլան այդ ուժեղ յարաբերութիւններուն արտայայտութիւնը», ըսաւ Փաշինեան:
Ան յաւելեց` այնպէս չէ, որ մինչեւ հիմա այդ արտայայտութիւնները չեն եղած: Յարաբերութիւնները կը զարգանան, այն նոր դրսեւորումներ ու արտայայտութիւններ պէտք է ունենայ: Ըստ վարչապետին` օրինակ, այդ արտայայտութիւններէն մէկը կրնայ ըլլալ վիզաներու ազատականացման բանակցութիւններու մեկնարկը Հայաստանի եւ ԵՄ-ի միջեւ: Յաջորդ թեմաներէն մէկը կրնայ ըլլալ առեւտրային արտօնեալ պայմաններու տրամադրումը Հայաստանի մէջ արտադրուած ապրանքներուն:
«Յաջորդ արտայայտութիւնը կրնայ ըլլալ անվտանգութեան ոլորտին մէջ մեր համագործակցութեան եւ յարաբերութիւններու խորացումը, նաեւ Հայաստանի մէջ ԵՄ քաղաքացիական դիտորդական առաքելութեան կարողութիւններու մեծացումը, ԵՄ դիտորդներու առաքելութիւնը եւս երկու տարիով երկարաձգելու մասին որոշումը եւ այսպէս շարունակ: Այս պահին գործող մանտաթը երկու տարի է», ըսաւ ան:
Հայաստանն ու ԵՄ-ն ունին շատ լայն օրակարգ: Հայաստանը պատրաստ է այդ օրակարգը ընդլայնելու եւ խորացնելու:
