Բրիտանիա Հայաստանի իշխանութիւններուն Հաւաքական անվտանգութեան պայմանագիրի կազմակերպութեան (ՀԱՊԿ) անդամակցութիւնը սառեցնելու որոշումը կ՛ընդունի եւ պատրաստ է Ռուսիոյ սպառնալիքներէն պաշտպանուելու համար աջակցութիւն ցուցաբերելու: «Սփութնիք»ը` յղում կատարելով «Ռաշա Թուտէյ»ին հաղորդեց, որ այս յայտարարութիւնը կատարեց Բրիտանիոյ պաշտպանութեան փոխնախարար Ճէյմզ Հիփի:
«Մեծն Բրիտանիա այդ որոշումը կ՛ընդունի իբրեւ Հայաստանի գերիշխան իրաւունքի իրականացում: Բրիտանիա պատրաստ է նաեւ համագործակցելու Եւրոատլանտեան դաշնակիցներու հետ` Հայաստանին Ռուսիոյ պատասխան գործողութիւններու սպառնալիքներուն դէմ աջակցութիւն ցուցաբերելու համար», յայտնեց Հիփի:
Ան` բրիտանական խորհրդարանի գրաւոր հարցումին իբրեւ պատասխան` ընդգծեց, որ Լոնտոն պիտի շարունակէ սերտօրէն համագործակցիլ Երեւանի հետ` փնտռելով յարաբերութիւններու խորացման ուղիներ:
