Հայ քաղաքական կուսակցութիւններու ներկայացուցիչներու հերթական հանդիպումը տեղի ունեցաւ Երկուշաբթի, 11 Մարտ 2024-ին, Ս.Դ.Հ.Կ.-ի կեդրոնատեղիին մէջ:
Խորհրդակցութիւններու առաջին բաժինը կը վերաբերէր Լիբանանի մէջ տիրող կացութեան, հարաւային Լիբանանի մէջ շարունակուող պատերազմական գործողութիւններուն պատճառով ճգնաժամի խորացման երեւոյթներուն եւ ընդհանրապէս երկրին վերաբերող տարբեր բնոյթի դժուարութիւններու յաղթահարման հնարաւոր միջոցներուն մասին:
Ժողովի հիմնական օրակարգը Հայոց ցեղասպանութեան 109-ամեակի ոգեկոչման միացեալ ձեռնարկներու կազմակերպման յատկացուած էր:
Հայ քաղաքական կուսակցութիւններու ներկայացուցիչները ընդգծեցին այս առիթով միասնական ներկայանալու անհրաժեշտութիւնը: Աշխատանքները կը ներառեն ներհամայնքային, լիբանանեան թէ համասփիւռքեան ու համահայկական ուղղութիւնները: Անոնք հաստատեցին, որ միացեալ կեցուածքները, դիրքորոշումներն ու քաղաքական նպատակաուղղուած պատգամներ յղելը ներկայ փուլին անպայման կþունենան հեռանկարային իմաստ մեր հետագայ աշխատանքները համակարգելու առումով:
Անհրաժեշտ նկատուեցաւ ուսանողական-երիտասարդական յատուկ ձեռնարկով լիբանանեան հասարակութեան մօտ շարունակուող ցեղասպանութիւններու մասին իրազեկում իրականացնել:
Ժողովը եզրակացուց Հայոց ցեղասպանութեան 109-ամեակի միացեալ ձեռնարկներուն հաղորդել երիտասարդական, ուսանողական, տեղակատուական բովանդակութիւն` քաղաքական այժմէական ուղերձներով, ինչպէս հայկական, այնպէս նաեւ լիբանանեան հանրային կարծիքի ձեւաւորման նպատակով:
Այս հիմնաւորումներով որոշուեցաւ կազմել միացեալ յանձնախումբեր նշուած ոլորտներով:
Հայ քաղաքական կուսակցութիւնները համոզուած են, որ միացեալ ձեռնարկներով եւ ոգեկոչական արարողութիւններով լիբանանահայ համայնքը հերթական անգամ պիտի յաջողի հունաւորել մեր համազգային պահանջատիրութեան նոր երթը:
