Հայաստանի Հանրապետութեան նախագահ Վահագն Խաչատուրեան ընդունած է Հայաստանի մէջ Արաբական Միացեալ Էմիրութիւններու արտակարգ եւ լիազօր դեսպան Նարիման Մոհամմատ Շարիֆ Ալ Մուլլան:
Հանդիպման ընթացքին երկուստեք գոհունակութեամբ արձանագրուած է երկու երկիրներուն միջեւ մուտքի արտօնագրերու ազատականացման գործընթացի դրական աւարտը, ինչ որ նոր խթան պիտի հանդիսանայ երկկողմ յարաբերութիւններու հետագայ զարգացման համար:
Զրոյցի ընթացքին անդրադարձ կատարուած է Հայաստանի եւ Միացեալ Էմիրութիւններու միջեւ համագործակցութեան շարք մը օրակարգային հարցերուն եւ համատեղ ջանքերով վերջիններուս լուծման հնարաւորութիւններուն:
