Հայաստանի Հանրապետութեան գլխաւոր դատախազ Աննա Վարդապետեանը եռօրեայ աշխատանքային այցով հոլանտա կը գտնուի:
Այցի շրջանակին մէջ Աննա Վարդապետեանը հանդիպած Հոլանտայի գլխաւոր դատախազ Սիու Փրինենին (Գլխաւոր դատախազներու խորհուրդի անդամ):
Հանդիպման մասնակցած է նաեւ Հոլանտայի մէջ Հայաստանի Հանրապետութեան արտակարգ եւ լիազօր դեսպան Վիքթոր Պիյակովը:
ՀՀ գլխաւոր դատախազը շնորհակալութիւն յայտնած է գործընկերոջ՝ հանդիպման պատրաստակամութեան համար եւ վստահութիւն յայտնած, որ հանդիպումը որակապէս նոր փուլ պիտի տեղափոխէ երկու երկիրներու դատախազութիւններուն միջեւ առկայ համագործակցութիւնը։
Գլխաւոր դատախազներու զրոյցի ընթացքին, ի թիւս այլնի, անդրադարձ կատարուած է քրէական գործերով համագործակցութեան արդիւնաւէտութեան բարձրացման, փոխգործակցութեան շրջանակին մէջ շարունակական վերապատրաստումներու միջոցով դատախազներու մասնագիտական կարողութիւններու զարգացման անհրաժեշտութեան:
Այս ծիրին մէջ, Աննա Վարդապետեանը կարեւորած է Հայաստանի մէջ Հոլանտայի դեսպանութեան աջակցութեամբ իրականացուող ծրագիրը՝ ուղղուած Հայաստանի բոլոր դատախազներու հաղորդակցման հմտութիւններու արդիւնաւէտութեան բարձրացման ու զարգացման։
ՀՀ գլխաւոր դատախազը գործընկերոջ հետ զրոյցին անդրադարձած է Երեւանի մէջ նախորդ տարի կայացած՝ Դատախազութեան հիմնադրման 105-ամեակին նուիրուած խորհրդաժողովի արդիւնքներուն եւ տեղեկացուցած է, որ այս տարուան Ապրիլին կրկին Եւրոպայի խորհուրդին աջակցութեամբ Հայաստանի մէջ տեղի պիտի ունենայ բարձրաստիճան խորհրդաժողով՝ Եւրոպայի խորհուրդի եւ անդամ պետութիւններու բարձրաստիճան պաշտօնեաներու մասնակցութեամբ:
Խորհրդաժողովին նպատակն է համախմբել Եւրոպայի խորհուրդի անդամ շարք մը երկիրներու բարձրաստիճան դատախազները եւ միջազգային կազմակերպութիւններու ներկայացուցիչները՝ քննարկելու այն մարտահրաւէրներն ու հեռանկարները, որոնք առկայ են ապօրինի ծագում ունեցող գոյքի բռնագանձման ոլորտին մէջ:
Միջազգային գործընկեր կառոյցներու հետ համագործակցութեան հարցերուն անդրադառնալով՝ Աննա Վարդապետեանը կարեւորած է 2024 թուականին նախատեսուող՝ Հայաստանի եւ Եւրաճասթի միջեւ քրէական գործերով դատական համագործակցութեան մասին համաձայնագրի կնքումը եւ առանձնացուցած է շաբաթներ առաջ արձանագրուած ձեռքբերումը՝ ՀՀ Գլխաւոր դատախազութեան ընդգրկումը Շրջակայ միջավայրի գործերով դատախազներու եւրոպական ցանցին մէջ (ENPE)՝ որպէս դիտորդ:
Սիու Փրինենի հետ զրոյցին ՀՀ գլխաւոր դատախազը ներկայացուցած է նաեւ Դատախազութեան առաջնահերթութիւնները՝ ուղղուած դրամներու լուացման, ապօրինի ծագում ունեցող գոյքի բռնագանձման, փտածութեան, թմրամիջոցներու ապօրինի շրջանառութեան եւ կիպերյանցագործութիւններու դէմ պայքարին:
Հոլանտայի գլխաւոր դատախազը Հայաստանի Հանրապետութեան Գլխաւոր դատախազութեան հետ համագործակցութիւնը խորացնելու պատրաստակամութիւն յայտնած է եւ անդրադարձած է երկուստեք հետաքրքրութիւն ներկայացնող շարք մը հարցերու:
