Հայաստանի քաղաքականութեան օրակարգին վրայ է Եւրոմիութեան անդամ երկիրներուն հետ աւելի սերտ յարաբերութիւններ ունենալը՝ հաշուի առնելով երկրին պետական շահը։ Այս մասին ըսաւ «Քաղաքացիական պայմանագիր» խմբակցութեան քարտուղար Արթուր Յովհաննիսեանը՝ պատասխանելով հարցումին, թէ արդեօք «Քաղաքացիական պայմանագիր» կուսակցութիւնը քննարկումներ կ՛ունենայ Հայաստանը ԵՄ թեկնածու-անդամ դարձնելու հնարաւորութեան շուրջ եւ մեկնաբանելով այդ առումով Ազգային ժողովի նախագահ Ալէն Սիմոնեանի խօսքը։
Յովհաննիսեան յիշեցուց, որ Եւրոխորհրդարանին մէջ վարչապետ Նիկոլ Փաշինեանը յստակ արձանագրածէ, որ Հայաստանի Հանրապետութիւնը պատրաստ է այնքան մօտենալ Եւրոմիութեան, որքան Եւրըմիութիւնը պատրաստ է։
«Այս իմաստով ես եւս մէկ անգամ պէտք է արձանագրեմ, որ, այո՛, մենք պատրաստ ենք աւելի ջերմ եւ արդիւնաւէտ յարաբերութիւններ ունենալու Եւրոմիութեան հետ՝ հաշուի առնելով նոր տնտեսական շուկաներու անհրաժեշտութիւնը, հաշուի առնելով մեր քաղաքակրթական եւ քաղաքական զարգացման ուղղութիւնը, հաշուի առնելով Հայաստանի Հանրապետութեան մէջ ժողովրդավարութեան կայացումը, հաշուի առնելով նաեւ այն հանգամանքը, որ Հայաստանի Հանրապետութեան սահմաններու անվտանգութեան երաշխաւորութեան իմաստով շատ կարեւոր նշանակութիւն ունի Եւրոմիութեան դիտորդական առաքելութիւնը։ Այս ծիրին մէջ եղած է պարոն Սիմոնեանի խօսքը, եւ մենք ալ ոչ մէկ անգամ արձանագրած ենք մեր պատրաստակամութիւնը եւ հողի վրայ ալ դուք կը տեսնէք յարաբերութիւններու մերձեցումը Հայաստանի եւ Եւրոմիութեան միջեւ։ Մեր քաղաքականութեան օրակարգին վրայ է Եւրոմիութեան անդամ երկիրներու հետ աւելի սերտ յարաբերութիւններ ունենալ՝ հաշուի առնելով Հայաստանի Հանրապետութեան պետական շահը», ընդգծեց Յովհաննիսեան։
«Քաղաքացիական պայմանագիր» խմբակցութեան պատգամաւոր, պետաիրաւական հարցերով յանձնաժողովի նախագահ Վլատիմիր Վարդանեանը իր հերթին աւելցուց, որ Հայաստանի հարեւան երկիրներէն երկուքը ԵՄ անդամակցութեան թեկնածու են եւ անդամակցութեան աշխարհագրական սահմանները կը տեղափոխուին դէպի Հայաստան։
«Համարկման միաւորման մասնակցելու իրաւունքը պետութեան ինքնիշխան իրաւունքն է, իսկ որեւիցէ մէկը չի բացառեր, որ տնտեսական համարկման առումով Եւրոպական միութեան օրինակը լաւագոյն օրինակներէն մէկն է, եթէ ոչ լաւագոյնը», եզրափակեց Վարդանեան։
