Իսրայէլեան «Ետիյոթ Ահարոնոթ» օրաթերթը հաղորդեց, որ Իսրայէլի ազգային ապահովութեան նախարար Էթիմար Պէն Ղաֆիր ճակատ պիտի բանայ վարչապետ Պենիամին Նեթանիահուի դէմ այն որոշումին պատճառով, որ ան կայացուց զինք հեռու պահելու Երուսաղէմի Աքսա մզկիթի թղթածրարէն: Կառավարութեան սեղմ կազմը յետս կոչած էր Պէն Ղաֆիրի կայացուցած որոշումը՝ արգիլելու հաւատացեալներու մուտքը Աքսա մզկիթ Ռամատան ամսուան ընթացքին: Պէն Ղաֆիր յայտարարեց, թէ կը սպասէ որ վարչապետը հերքէ այն լուրերը, թէ իրմէ վերցուցած է Աքսա մզկիթի թղթածրարը: Այս հարցը կրնայ պայթումի մը առաջնորդել գրաւեալ Երուսաղէմի մէջ, եթէ քայլեր չառնուին մեղմացնելու համար լարուած վիճակը:
