Դիւանագիտական աղբիւրներ յայտարարեցին, թէ Իսրայէլի ապահովական շրջանակներու մէջ զայրոյթի ալիքը յստակ էր, երբ Հըզպալլայի հակաօդային պաշտպանութեան ուժերը կրցան վար առնել ամենազարգացած անօդաչու թռչող սարքը՝ «Հերմէս»ը: Ամերիկեան կողմը մտավախութիւն արտայայտեց, որ այս արարքը կրնայ դուռ բանալ սահմանային գօտիին մէջ մեծ բախումի մը: Այս է պատճառը որ Միացեալ Նահանգներու Արտաքին գործերու նախարարութիւնը փորձեց հանդարտեցնել վիճակը ու կանխել որեւէ մեծ բռնկում, վստահեցնելով որ բանակցութիւններ տեղի կ’ունենան զինադադար հաստատելու համար:
Պաալպէքի վրայ կատարուած օդային յարձակումը հակադարձութիւն էր «Հերմէս»ի վար առնուելուն: Վախ կայ որ Իսրայէլ նաեւ ռմբակոծէ Հերմէլի շրջանը, ուր Հըզպալլա ունի անօդաչու թռչող սարքերու օդակայան եւ անօդաչու թռչող սարքերու գործարան ու պահեստանոց:
Ըստ լաւատեղեակ աղբիւրներու, երկու կողմերու կատարած քայլերը բանակցութեան վրայ ճնշում բանեցնելու ու աւելի մեծ զիջում ստանալու փորձեր են:
