Մինչ մարտերը կը շարունակուին Կազայի հիւսիսային հատուածին մէջ, իսրայէլեան բանակը յայտարարեց, թէ զինուոր մը մահացած է այդ շրջանին մէջ տեղի ունեցած խուզարկումներուն ընթացքին: Համաս իր կարգին շեշտեց, որ դէմ դրած է Կազայի հիւսիսը գործողութիւններ իրականացնող իսրայէլեան ուժերուն եւ հրթիռային միջոցներով կործանած է անոնց մեքենաները՝ պատճառելով կորուստներ:
Իսրայէլի վարչապետ Պենիամին Նեթանիահու նշեց, որ տակաւին յստակ չէ Համասի հետ գերիներու փոխանակումի համաձայնութիւն մը կնքելու հնարաւորութիւնը: Նախապէս, իսրայէլեան լրատուամիջոցներ նշած էին, որ ապահովական սեղմ կառավարութիւնը կը քննարկէ զինադադարի առաջարկները, որոնք բխած էին Փարիզի մէջ տեղի ունեցած ժողովներէն:
Իսրայէլի նախկին վարչապետ Էհուտ Պարաք Նեթանիահուն ամբաստանեց Կազայի մէջ իսրայէլացի գերիներուն կեանքը վտանգելու մէջ՝ ուժեղ ձեւանալու եւ իշխանութիւնը պահելու նպատակով: Պարաք իսրայէլացիներուն կոչ ուղղեց կազմակերպելու հակակառավարական հաւաքներ եւ պաշարելու Քնէյսէթը՝ բողոքելու կառավարութեան քաղաքականութիւններուն դէմ: «Մենք կարիք ունինք 300 հազար ցուցարարի, որպէսզի երեք շաբաթ պաշարենք Քնէյսէթը եւ կառավարութիւնը իմանայ, թէ չի վայելեր ժողովուրդին վստահութիւնը», ըսաւ Պարաք: Նշենք, որ ոստիկանութիւնը շաբաթ օր ձերբակալեց Թել Աւիւի կեդրոնական շրջանին մէջ բողոքի ցոյց կազմակերպող 18 հոգի, որոնք կը պահանջէին Համասի հետ կնքել գերիներու փոխանակումի համաձայնութիւն մը:
