Հայաստանի Հանրապետութեան վարչապետ Նիկոլ Փաշինեան շնորհաւորական ուղերձ յղած է Ճափոնի վարչապետ Ֆումիօ Քիշիտային՝ ազգային տօնին առթիւ:
Ուղերձին մէջ նշուած է.
«Ջերմօրէն շնորհաւորում եմ Ձեզ Ճափոնի ազգային տօնի՝ Նորին Մեծութիւն Ճափոնի Կայսեր ծննդեան օրուան առնչութեամբ:
Դիւանագիտական յարաբերութիւնների հաստատումից ի վեր՝ Հայաստանի եւ Ճափոնի միջեւ ձեւաւորուել են ժողովրդավարական արժէքների, փոխադարձ յարգանքի եւ վստահութեան վրայ հիմնուած բարեկամական յարաբերութիւններ:
Ներկայում Հարաւային Կովկասում եւ աշխարհում առկայ բազում մարտահրաւէրների եւ սպառնալիքների պայմաններում Հայաստանը մեծապէս կարեւորում է Ճափոնի հետ գործընկերային յարաբերութիւնների հետագայ խորացումն ու ընդլայնումը՝ բարձր գնահատելով Ճափոնի կողմից Հայաստանի տարբեր ոլորտների զարգացմանն ուղղուած բազմակողմանի աջակցութիւնը: Այս կապակցութեամբ վերահաստատում եմ Ձեզ ուղղուած՝ Հայաստան այցելելու հրաւէրս՝ երկկողմ միջպետական յարաբերութիւններն ամրապնդելու հետ կապուած հարցերը քննարկելու նպատակով:
Մաղթում եմ Ձեզ քաջառողջութիւն եւ նորանոր յաջողութիւններ, իսկ Ճափոնի բարեկամ ժողովրդին՝ բարեկեցութիւն եւ ամենայն բարիք»:
