Ռազմական ոլորտին մէջ հայ-ֆրանսական համագործակցութիւնը յանուն Հայաստանի Հանրապետութեան է եւ որեւէ երկրի դէմ չէ։
Այս մասին յայտնեց Հայաստանի Հանրապետութեան պաշտպանութեան նախարար Սուրէն Պապիկեանը՝ Ֆրանսայի զինուած ուժերու նախարար Սեպասթիեն Լըքորնիուի հետ համատեղ ասուլիսի ժամանակ։
«Մեր իրաւունքն է համագործակցիլ ե՛ւ Ֆրանսայի, ե՛ւ Իրանի հետ, եւ այդ ի գիտութիւն պէտք է ըլլայ բոլորին: Մեր ֆրանսացի գործընկերները կը յարգեն համագործակցութիւնը այդ գործընկերներուն հետ, իրանցի գործընկերները եւս կը յարգեն այդ համագործակցութիւնը», ըսաւ Պապիկեան՝ կարծիք յայտնելով, որ նոյնը պէտք է ընեն նաեւ ռուսաստանցի, ինչպէս նաեւ միւս գործընկերները, որովհետեւ Հայաստանը չունի թապուներ՝ ի շահ Հայաստանի Հանրապետութեան տարբեր երկիրներու հետ համագործակցելու առումով։
Ան յաւելած է, որ սա միայն Հայաստանի Հանրապետութեան տարածքային ամբողջականութեան համար է եւ որեւէ երկրի դէմ ուղղուած չէ։
