Փարիզի մէջ տեղի ունեցած է վարչապետ Նիկոլ Փաշինեանի հանդիպումը Ֆրանսայի վարչապետ Կապրիէլ Աթալի հետ:
Ֆրանսայի վարչապետը ողջունած է Նիկոլ Փաշինեանի այցը եւ ընդգծած է իր գլխաւորած կառավարութեան պատրաստակամութիւնը` հետեւողականօրէն զարգացնելու համագործակցութիւնը Հայաստանի հետ:
Նիկոլ Փաշինեան եւս մէկ անգամ շնորհաւորած է Կապրիէլ Աթալը վարչապետի պաշտօնը ստանձնելու առիթով եւ մաղթած է յաջողութիւններ: Վարչապետը կարեւորած է Ֆրանսայի կառավարութեան հետ տարբեր ոլորտներու մէջ փոխգործակցութեան խորացումն ու ընդլայնումը:
Մասնաւորապէս, զրուցակիցները քննարկած են առեւտրատնտեսական կապերու, շինարարութեան, ենթակառուցուածքներու զարգացման, ուժանիւթի, ջրային ոլորտի կառավարման, զբօսաշրջութեան բնագաւառներուն մէջ գործակցութեան եւ համատեղ ծրագրերու իրականացման վերաբերող հարցերու լայն շրջանակ:
Վարչապետ Փաշինեան կարեւորած է Ֆրանսայի կառավարութեան աջակցութիւնը Հայաստանին` շուկաներու բազմազանեցման, ինչպէս նաեւ չափանիշերու ներդրման ուղղութեամբ:
Նիկոլ Փաշինեան Կապրիէլ Աթալը պաշտօնական այցով հրաւիրած է Հայաստան: Ֆրանսայի վարչապետը հրաւէրը սիրով ընդունած է:
