«Եւրոպացիները յանուն Արցախի» շարժումը նամակ յղած է Միջազգային ողիմպիական կոմիտէի (ՄՈԿ) նախագահին՝ 2024 թուականին Փարիզի մէջ կայանալիք ամառնային ողիմպիական խաղերուն Ատրպէյճանին մասնակցութենէն զրկելու վերաբերեալ եւ կոչ ըրած է ՄՈԿ-ին յստակ միջոցներ ձեռնարկելու այդ երկրի մասնակցութեան դէմ։
Նամակը ուղարկուած է նաեւ Ֆրանսայի Հանրապետութեան նախագահին, Ֆրանսայի ազգային ողիմպիական կոմիտէին, Ֆրանսայի ողիմպիական խաղերու կազմակերպիչ կոմիտեին, Փարիզի քաղաքապետարանին, ինչպէս նաեւ մարմնամարզի, ողիմպիական ու փարօլիմփիք խաղերու նախարարին։
Ելլելով Լեռնային Ղարաբաղի ժողովուրդին դէմ Ատրպէյճանի կողմէ իրականացուած ցեղային զտման փաստէն` «Եւրոպացիները յանուն Արցախի» շարժումը ՄՈԿ-ին կոչ ըրած է արգիլելու Ատրպէյճանին որպէս պետութիւն ներկայացուած ըլլալ գալիք Ողիմպիական խաղերուն եւ թոյլ տալու ատրպէյճանցի մարզիկներուն հանդէս գալու միայն չէզոք դրօշի ներքոյ։ Այս կոչը հնչած է Լեռնային Ղարաբաղի մէջ 2023 թուականի Սեպտեմբերին Ատրպէյճանի ցեղասպան քաղաքականութեան եւ ցեղային զտումներու հետեւանքով իրենց պապենական հողերէն 120.000 հայերու բռնի տեղահանման պայմաններու մէջ։
Նամակին պատասխանած է միայն Ֆրանսայի ազգային ողիմպիական կոմիտէն՝ ընդունելով իրավիճակը եւ նկատած է, որ իր դիրքորոշումը համահունչ է Ֆրանսայի կառավարութեան դիրքորոշման եւ անոր դիւանագիտական ջանքերուն՝ նշելով.
«Մենք չենք կրնար անհաղորդ մնալ նման աղէտի հանդէպ»։
«Եւրոպացիները յանուն Արցախի» շարժումը կ՛ակնկալէ Միջազգային ողիմպիական կոմիտէի յստակ դիրքորոշումը, քանի որ որեւէ քայլ չձեռնարկելը պիտի խաթարէ Ողիմպիական խաղերու ամբողջական նշանակութիւնը եւ ճանապարհ պիտի հարթէ ռազմատենչ պետութիւններու համար։
