Ֆրանսական «Լիպերասիոն» օրաթերթը հաղորդեց, որ Հըզպալլա 1980-ականներէն սկսեալ Հիւսիսային Քորէայի օժանդակութեամբ սկսած է փորել փապուղիներու մեծ ցանց մը՝ դէմ դնելու համար իսրայէլեան որեւէ յարձակումի: Օրաթերթը նաեւ յիշեց, որ 8 Հոկտեմբերին Հըզպալլա ցոյց տուաւ տեսերիզ մը, որուն մէջ կ’երեւին Հըզպալլայի յատուկ ջոկատային «Ռատուան» գումարտակի անդամներ, որոնք փապուղիէ մը դուրս կ’ելլեն ու կը յարձակին Իսրայէլի վրայ: Ըստ օրաթերթին, Հըզպալլայի ունեցած փապուղիներուն ցանցը շատ աւելի կատարելագործուած է «Համաս»ի ունեցած ցանցէն Կազայի մէջ: Այդ ցանցը կը հասնի մինչեւ Իսրայէլ ու կրնայ հասնիլ նաեւ Սուրիա:
