Պելճիքայի բռնցքամարտի երիտասարդներու ախոյեանութեան ծիրէն ներս, հայազգի փայլուն աստղ՝ Հ.Մ.Մ.-ական Վազգէն Կայէնեան կը շարունակէ արձանագրել փայլուն յաղթանակներ։ Ան կը խոստանայ հասնիլ Ողիմպիականի։
Վազգէն Կայէնեան համեստ եւ ժպտադէմ հայրենասէր երիտասարդը հայ գաղութին անունը բարձր պահող մարզիկն է եւ իր շրջապատին կողմէ սիրուած է։
Գորոնա համաճարակի օրերուն իսկ, մեր սիրելի Վազգէնը բռնցքամարտի փորձ-խաղեր եւ ախոյեանութեան հետեւած էր, որոնց շնորհիւ կրցած էր պահել իր վարկը եւ վերադարձած էր Պելճիքայի ազգային հաւաքական, եւ տարուէ-տարի աւելի ինքնավստահ կը մասնակցի ախոյեանութեան եւ բարեկամական մրցումներուն։
«Արարատե օրաթերթի մարզական էջին մէջ յաճախ անդրադարձ եղած է 2015-էն սկսեալ բռնցքամարտի մազաձեւին մէջ արձանագրած անոր փայլուն արդիւնքներուն, որ շարունակուելով մինչեւ 2021 ան հանդիսացած է ախոյեան։
Պելճիքայի հանրային հեռատեսիլը գիտակցելով Վազգէնի յաջողութիւններուն յաճախակի հարցազրոյցներ կը կատարէ անոր հետ։
Վազգէնին հայրը՝ մեր սիրելի ընկեր Կարօն, մշտական եւ հետեւողական խորհուրդներ տալով եւ մրցաշարքերու մասնակցելու համար քաղաքէ-քաղաք կ’ընկերակցի Վազգէնին։ Անցեալ ամիսներուն մասնակցած ըլլալով տարբեր մարզիկներու եւ տարիքային այլ խմբաւորումներու մրցաշարքի, Վազգէնը արձանագրած էր պատուաբեր արդիւնքներ։
Վազգէնին ցանկութիւնն է մասնակցիլ ողիմպիական խաղերու, որոնք տեղի պիտի ունենան 2024-ին Փարիզի, իսկ 2028-ին՝ Ամերիկայի մէջ: Պելճիքայի բռնցքամարտի ֆետերասիոնի տնօրէնութիւնը քաջածանօթ է Կայէնեանին, արձանագրած արդիւնքներուն եւ լրջօրէն կը հետեւի Վազգէնի փորձերուն։ Ան առաջատար է իր խումբին մէջ:
Այսպէս շարունակելով անոր ապագան փայլուն է:
Այս բոլորէն աւելի ուրախ ենք արմատներով հայ ազգի զաւակ ըլալուն։ Գալով Վազգէնի խօսքերուն, ան շատ հպարտ է իր անուն ազգանունով, Հնչակեան եւ Հ.Մ.Մ.-ական ընտանիքէ ըլլալուն:
Նորանոր յաջողութիւններ կը մաղթենք մեր սիրելի Վազգէնին եւ իր հօրը՝ ընկեր Կարոյին ամէն ճիգերուն, սպասելով ախոյեանի տիտղոսներուն։
ԳԷՈՐԳ ՎԱՀԱՆ ՏԱՂԼԵԱՆ