Հայ ժողովուրդը երէկ նշեց Հայաստանի Հանրապետութեան զինուած ուժերու կազմաւորումի 32-ամեակը: Այս առթիւ Կարէն Տեմիրճեանի անուան մարզահամերգային համալիրին մէջ տեղի ունեցաւ տօնական հանդիսութիւն: Պաշտօնատարներէն շատերª ներառեալ նախագահն ու վարչապետը, այցելեցին նաեւ Եռաբլուրի պանթէոնª յարգելու նահատակներուն յիշատակը:
Հայաստանի վարչապետ Նիկոլ Փաշինեան շեշտեց Հայաստանի անվտանգութեան մասին ռազմավարական պատկերացումները վերատեսութեան ենթարկելու անհրաժեշտութիւնը: Անոր համաձայն, անհրաժեշտ է նախ փոխել մտածելակերպը, խորհիլ բանակաշինութեան եւ անվտանգութեան ոլորտին մէջ եղած խնդիրներուն, նոյնիսկ ձախողութիւններուն մասին: ՙԱռերեսումը կը պարտադրէ ձերբազատուիլ հին չափանիշերէն, որոնց վրայ հիմնուած է բանակը, որովհետեւ այդ կը նշանակէ կասկածի տակ դնել պետութիւն ունենալու հայուն կամքը՚, ըսաւ Փաշինեան: Անոր համաձայն, բարեփոխումներու աշխատանքը սկսած է, սակայն տակաւին բաւական արագ չ՛ընթանար: Վարչապետին համաձայն, անհրաժեշտ է ունենալ արհեստավարժ բանակ, ուր ծառայողները կը ստանան բաւարար աշխատավարձ, կը ծառայեն բնակութեան վայրի մօտակայ զօրամասի մէջ եւ ծառայութեան աւարտին կը ստանան հատուցում:
Հանրապետութեան նախագահ Վահագն Խաչատուրեան իր շնորհաւորական ուղերձին մէջ դիտլ տուաւ, որ բանակը եղած է ու կը մնայ պետութեան եւ քաղաքացիներու անվտանգութեան ու պաշտպաութեան գլխաւոր եւ կարեւորագոյն երաշխաւորը:
Ազգային ժողովի նախագահ Ալէն Սիմոնեան իր կարգին նշեց, որ բանակը արձանագրած է բազում նուաճումներ եւ ծանր կորուստ, սակայն հայ զինուորի ոգին միշտ եղած է անպարտելի:
