Կազայի մէջ իշխող Համասի առողջապահութեան նախարարութիւնը յայտարարեց, թէ աւելի քան երեք ամիսէ շարունակուող իսրայէլեան յարձակումներուն հետեւանքով մահացած պաղեստինցիներուն թիւը հասած է շուրջ 26.500-ի, մինչ աւելի քան 65 հազար մարդ վիրաւորուած է ռմբակոծումներէն եւ ցամաքային գործողութիւններէն: Ըստ նախարարութեան, միայն 24 ժամուան ընթացքին մահացած է 165 մարդ եւ վիրաւորուած են 290 ուրիշներ:
Պաղեստինեան շարժումները, իրենց կարգին, յայտարարեցին իսրայէլեան բանակին եւ բնակավայրերուն դէմ գործողութիւններ իրականացնելու մասին: Ժիհատի ՙԵրուսաղէմի փաղանգներ՚ զինեալ թեւը յայտարարեց, թէ հրթիռներ արձակած է Կազայի մերձակայ բնակավայրեր Ստիրոթի, Նիրաամի եւ այլ շրջաններու ուղղութեամբ, իսկ Կազայի մէջ թիրախաւորած է իսրայէլեան հրասայլեր ու զրահապատ մեքենաներ:
