Լիբանանեան ուժեր կուսակցութեան նախագահ Սամիր Ժաաժաա կառավարութիւնը բաղկացնող քաղաքական ուժերըª ներառեալ Ազգային ազատ հոսանքը, պատասխանատու համարեց այն վտանգաւոր իրավիճակին, որուն կրնայ մատնուիլ Լիբանան: ՙՏարածաշրջանին մէջ լարուածութիւնը կը սրի ու կը փոխադրուի վայրէ վայր: Իրանն ու իր թեւերը կ’առճակատին ամերիկացիներուն եւ Իսրայէլին դէմ, իսկ լիբանանցիները կ’ապրին մեծ մտավախութիւններու փուլ մը՚, ըսաւ Ժաաժաա: Ան զարմանք յայտնեց, թէ ինչպէս գործող կառավարութիւնը երկրին ապահովական եւ ռազմավարական գերագոյն որոշումները յանձնած է Հըզպալլայինª Լիբանանն ու լիբանանցիները ենթակայ ձգելով տարածաշրջանային փոթորիկներուն: ՙԻ՞նչ իրաւունքով ու տրամաբանութեամբ Լիբանանը կը մխրճեն տարածաշրջանային այս արիւնալի բախումին մէջ՚, հարց տուաւ Ժաաժաա:
Ազգային ազատ հոսանքը հաղորդագրութեամբ մը իսկոյն հակադարձեց Լիբանանեան ուժեր կուսակցութեան ղեկավարի ամբաստանութիւններուն եւ շեշտեց, որ իրենք կառավարութեան միակ ընդդիմադիրն են, իսկ Ժաաժաան է նախարարաց գործող խորհուրդի ապօրինի նիստերը քօղարկողը:
Այլ գիծի վրայ, Ազգային ազատ հոսանքը երէկ պաշտօնապէս յայտարարեց լիբանանեան ներքին տարակարծութիւնները լուծելու միտող կեդրոնի մը հիմնումը: Հոսանքի նախագահ Ժըպրան Պասիլ յայտնեց, որ նոր կեդրոնին նպատակն է խնդիրները լուծել արդիական միջոցներովª Լիբանանի մէջ զարգացնելով միութենական գործունէութիւնը:
