Կազայի պատերազմի սկիզբէն ի վեր առաջին անգամ ըլլալով, Քաթարէն դեղորայք ուղարկուեցաւ Կազայի մէջ արգելափակուած իսրայէլացիներուն եւ պաղեստինցի քաղաքայիններուն: Այսուհանդերձ, Համաս նոր պայմաններ առաջադրեց համաձայնութիւնը գործադրելու համար, պահանջելով իսրայէլացի գերիներուն յատկացուած դեղի մէկ տուփին դիմաց հազար տուփ յատկացնել պաղեստինցիներուն: Յիշեցնենք, որ քաթարեան-ֆրանսական միջնորդութեամբ նախանցեալ գիշեր համաձայնութիւն գոյացած էր մարդասիրական օգնութիւն փոխանցելու պաշարուած պաղեստինցիներուն, միաժամանակ դեղ տրամադրելով պաղեստինեան կազմակերպութիւններուն քով արգելափակուած իսրայէլացիներուն:
Իսրայէլեան լրատուամիջոցներ հաղորդեցին, որ ըստ վարչապետ Պենիամին Նեթանիահուի արժեւորումին, Համասի դէմ պատերազմը երկար պիտի տեւէ եւ կրնայ շարունակուիլ մինչեւ 2025 թուական:
Պաղեստինեան առողջապահութեան նախարարութիւնը յայտարարեց, թէ Կազայի դէմ Իսրայէլի շղթայազերծած յարձակումներուն ընթացքին զոհուած մարդոց թիւը բարձրացաւ առնուազն 24.500-ի, իսկ վիրաւորներուն թիւըª աւելի քան 61.500-ի: Ըստ նախարարութեան երէկուան յայտարարութեան, 24 ժամուան ընթացքին ինկած է 163 զոհ ու 350 վիրաւոր եւսª իսրայէլեան 16 սպանդի պատճառով:
Համասի ՙՔասսամ՚ զինեալ թեւը յայտարարեց, որ Կազայի Խան Եունէս շրջանին մէջ թիրախաւորած է իսրայէլեան զօրախումբ մը եւ անոր անդամներուն հետ բախածª պատճառելով մարդկային եւ նիւթական վնաս:
Իսրայէլեան բանակը միւս կողմէ նշեց, որ սպայ մը եւ զինուոր մը մահացած են Կազայի հիւսիսային շրջանին մէջ երէկ տեղի ունեցած մարտերու ընթացքին:
