Համասի ՙՔասսամ՚ զինեալ թիւը երէկ երեկոյեան յայտարարեց, թէ Լիբանանի հարաւային շրջաններէն իսրայէլեան Լիման զօրամասին ուղղութեամբ արձակած է 20 հրթիռª որպէս հակադարձութիւն Պէյրութի հարաւային արուարձաններուն մէջ իր ղեկավարներէն Սալէհ Արուրիի ահաբեկումին: Քասսամ նաեւ նշեց, որ Լիբանանի հարաւային շրջաններուն մէջ տեղի ունեցած բախումներու ընթացքին մահացած է իր անդամներէնª Սայտայի Միյէ ու Միյէ գաղթակայանի բնակիչ Ուալիտ Ահմատ Հասանէյնը:
Իսրայէլեան ռազմական օդանաւերը երէկ շարք մը յարձակումներ գործեցին սահմանային Հուլա բնակավայրին վրայ, ուր թիրախաւորեցին ու կործանեցին քաղաքացիներուն պատկանող բնակարաններ: Իսկ իսրայէլեան հրետանին երէկ ծանր հարուածներ հասցուց սահմանային Հապպարիէ, Ռաշայա Ֆըխաար շրջաններուն, որոնց վերեւ նկատուեցաւ անօդաչու թռչող սարքերու մնայուն ներկայութիւնը: Իսկ սահմանի կեդրոնական Ալմա Շաապ գիւղին մէջ իսրայէլեան ռմբակոծութենէն բաժին հասաւ աւետարանական եկեղեցւոյ, որուն մերձակայքը վնասուեցաւ նաեւ եկեղեցւոյ հովիւª պատուելի Ռապիհ Թալէպի բնակարանը: Իսկ սահմանի արեւելեան հատուածի Ուազզանի շրջանին մէջ իսրայէլացիները կրակ բացին այգեգործներուն ուղութեամբ, առանց պատճառելու վիրաւորներ:
Նշենք, որ իսրայէլեան բանակը անցնող օրերուն կը շարունակէ լայնածաւալ զինավարժութիւնները, որոնց նպատակն է ստուգել զինուորներուն պատրաստուածութիւնըª Լիբանանի մէջ ցամաքային լայնածաւալ գործողութիւն մը իրականացնելու որոշումի պարագային:
