Իսլանտայի Ռեյքեանես թերակղզիին մէջ 14 Յունուարի վաղ առաւօտեան հրաբուխ ժայթքած է. լաւան լեցուած է Գրինդաւիկ քաղաք, ուր քանի մը տուներու մէջ հրդեհ բռնկած է: Քաղաքին ամբողջ բնակչութիւնը տարհանուած է:
Հրաբուխը ժայթքած էր նաեւ Դեկտեմբերին, որմէ յետոյ կառուցուած պատնէշները մասամբ կրցած են զսպել լաւայի հոսքը, սակայն լաւան ճեղքած է պաշտպանական ամրութիւններէն քանիս մը հատը:
Բնակիչները, որոնք Դեկտեմբերի ժայթքումէն յետոյ վերադարձած էին Գրինդաւիկ, ստիպուած եղած են դարձեալ լքել իրենց տուները: Հրաբուխագէտները կը նշեն, որ ներկայիս ժայթքումը չափազանց վտանգաւոր է` հաշուի առնելով, որ լաւան լեցուած է քաղաք:
Կառավարութիւնը պէտք է քննարկէ տարհանուած բնակիչները կացարանով ապահովելու հարցը: Երկրին մէջ տագնապի մակարդակը բարձրացուած է ամենաբարձր` երրորդ աստիճանի, ինչ որ կը նշանակէ, որ առկայ է մարդոց, համայնքներուն, գոյքին եւ շրջակայ միջավայրին սպառնացող վտանգ:
Վերջին ժայթքումը արդէն հինգերորդն է Ռեյքեանես թերակղզիին մէջ 2021 թուականէն ի վեր:
