Լիբանանեան բանակի հրամանատարութիւնը յայտարարեց, թէ Յունուարին լիբանանեան զանազան շրջաններու մէջ ձեռնարկուած ապահովական քայլերուն շնորհիւ կարելի եղած է ձերբակալել զանազան հարցերով հետապնդուած 435 լիբանանցի եւ օտարազգի: Անոնք կը դիմագրաւեն թմրանիւթի վաճառականութեան, գողութեան, ապօրինի զէնք կրելու, առանց փաստաթուղթի ինքնաշարժ վարելու եւ ապօրինաբար Լիբանան գտնուելու ամբաստանութիւն: Բանակի հաղորդագրութեան համաձայն, հետախուզական ծառայութիւններ նաեւ կանխած են մարդ մաքսանենգելու փորձեր եւ առգրաւած են 39 կտոր զէնք, ձեռնառումբ, զինամթերք, շարժանիւներ, հաղորդակցութեանց միջոցներ եւ թմրանիւթ: Ձերբակալուած մարդիկն ու գրաւուած նիւթերը յանձնուած են դատական առնչակից մարմիններուն:
