Լիբանանցի պաշտօնատարներ եւ քաղաքական ղեկավարներ կը շարունակեն երկրի ներքին եւ տարածաշրջանային հարցերը արծարծել օտարազգի դիւանագէտներու հետª լիբանանեան ճգնաժամերը լուծելու համար արտաքին առաջարկներ լսելու ակնկալութեամբ:
Արտաքին գործերու նախարարի պաշտօնակատար Ապտալլա Պու Հապիպ տեսակցեցաւ Միացեալ Նահանգներու դեսպանի գործակատար Լիզա Ճոնսընի հետ եւ ուրախութիւն յայտնեց, որ Ուաշինկթըն պատրաստ է միջնորդելուª մեղմելու համար տարածաշրջանային լարուածութիւնը եւ վերականգնելու Լիբանանի հարաւային գօտիին կայունութիւնը: ՙԱմերիկեան կողմին հետ կը հաղորդակցինք դրական միտումովª յանգելու համար երկարատեւ լուծումներու, որոնք կը պաշտպանեն Լիբանանի գերիշխանութիւնն ու հողային ամբողջականութիւնը, միաժամանակ երաշխաւորելով լիբանանցիներունª ընդ որում հարաւի բնակչութեան իրաւունքները՚, ըսաւ Պու Հապիպ:
Իր կարգին, Ազգային ազատ հոսանքի նախագահ, երեսփոխան Ժըպրան Պասիլ տեսակցեցաւ Լիբանանի մէջ Ֆրանսայի նորանշանակ դեսպանին հետ: Ժողովականները քնարկեցին Կազայի զարգացումներու լոյսին տակ Լիբանանի հարաւային գօտիին զարգացումները, քաղաքական եւ ապահովական իրադարձութիւններըª ներառեալ Հանրապետութեան նոր նախագահի ընտրութեան եւ արմատական բարեփոխումներ իրականացնելու հարցերը: Պասիլ վերստին շեշտեց Լիբանանը շրջանային հակամարտութեան հաւանական ընդարձակումէն զերծ պահելու կարեւորութիւնը, ապա դեսպանին ներկայացուց նախագահի ընտրութեան եւ այլ նիւթերով իր գլխաւորած հոսանքին քաղաքական դիրքորոշումները:
Իսկ Լիբանանի մէջ Սէուտական Արաբիոյ դեսպան Ուալիտ Պուխարի երէկ տեսակցեցաւ Հանրապետութեան մուֆթի շէյխ Ապտըլ Լաթիֆ Տարիանի հետª քննարկելու լիբանանեան եւ պաղեստինեան զարգացումները, Կազայի դէմ իսրայէլեան յարձակումները եւ այնտեղ տիրող մարդասիրական վիճակը: Սէուտցի դեսպանը վերահաստատեց, որ Ռիատ կը կանգնի լիբանանցիներուն եւ լիբանանեան հասատութիւններուն կողքին, խոստանալով ջանք չխնայելª լուծելու համար լիբանանցիներուն դիմագրաւած բազմազան խնդիրները: Հանրապետութեան մուֆթին իր կարգին մաղթեց, որ սէուտական ջանքերը արդիւնաւորուին Լիբանանի Հանրապետութեան նոր նախագահի ընտրութեամբª վերակազմակերպելու համար պետական հաստատութիւններուն գործունէութիւնը:
Միացեալ Նահանգներու Արտաքին գործերու նախարարութեան բանբեր Սամուէլ Ուըրպըրկ իր կարգին յայտնեց, որ իրենք լիբանանցիներուն նման չեն ուզեր տեսնել տարածաշրջանային հակամարտութեան ընդարձակումը: ՙԱմերիկացի պատուիրակ Ամուս Հոքշթայն Լիբանան ժամանեց հաստատելու այդ մասին՚, ըսաւ Ուըրպըրկ եւ դժգոհեցաւ Հըզպալլայի սահմանային գործողութիւններէն: ՙՀարց կու տանք, թէ Հըզպալլային ո՞վ իրաւասութիւն տուած է յարձակումներ գործելու Իսրայէլի դէմ՚, ըսաւ ամերիկացի բանբերը:
