Ֆրանսայի Արտաքին գործերու նախարարութիւնը Ատրպէյճանէն պահանջեց անմիջապէս ազատ արձակել լրտեսութեան յանցանքով ամբաստանուած ֆրանսացի գործարարը, անոր հասցէին կատարուած ամբաստանութիւնները անհիմն որակելով£
Յիշեցնենք, որ 9 Յունուարին Պաքու հաստատեց այն լուրերը, թէ լրտեսութեան կասկածով աւելի քան ամիս մը առաջ ձերբակալուած է Մարթին Ռիանը, որ կրնայ մինչեւ 15 տարուան բանտարկութեան դատապարտուիլ£
Ֆրանսայի Արտաքին գործերու նախարարութիւնը հաղորդեց, որ կապի մէջ է Ատրպէյճանի մէջ Ֆրանսայի դեսպանատան հետ, որուն անձնակազմին անդամները երկու առիթներով կրցած են տեսակցիլ Ռիանի հետ£
Հակադարձելով Փարիզի յայտարարութեան, Ատրպէյճանի Արտաքին գործերու նախարարութիւնը Չորեքշաբթի օր պահանջեց Ֆրանսայէն, որ ՙմիջամուխ չըլլայ Ատրպէյճանի ներքին գործերուն՚£
