ՙԼեռնային Ղարաբաղª վտանգուած հայկական ժառանգութիւն՚ խորագրով բացօթեայ ցուցահանդէսի առանցքին Լեռնային Ղարաբաղի հայկական պատմամշակութային ժառանգութիւնը ներկայացնող 30 բացառիկ լուսանկար ընդգրկուած է£
Ցուցահանդէսը, որ բացուած է 14 Դեկտեմբերին Փարիզի նշանաւոր Պասթիլի հրապարակին վրայ եւ պիտի գործէ մինչեւ 15 Յունուար, կազմակերպած են Փարիզի քաղաքապետարանն ու ՙL’ouvre d’Orient՚ կաթոլիկ կազմակերպութիւնը: Այս մասին յայտնած է Ֆրանսայի մէջ ՀՀ դեսպանութենէն:
Ցուցահանդէսի պաշտօնական բացման ընթացքին Ֆրանսայի մէջ Հայաստանի դեսպան Յասմիկ Տոլմաճեան շնորհակալութիւն յայտնած է Փարիզի քաղաքապետարանին եւ ՙL’ouvre d’Orient՚ կաթոլիկ կազմակերպութեան Հայաստանի եւ հայ ժողովուրդի կողքին մշտապէս ըլլալու համար եւ նշած է, որ ցուցահանդէսին կազմակերպումը այդ համերաշխութեան հերթական դրսեւորումն է£
Հայաստանի դեսպանը շեշտած է, որ Լեռնային Ղարաբաղի ժողովուրդին նկատմամբ ցեղային զտում իրականացնելէ յետոյ այժմ Ատրպէյճանը քայլեր կը ձեռնարկէ վերացնելու այնտեղ հայկական բամահազարամեայ ներկայութեան հետքերը, որոնց խօսուն ապացոյցներն են ցուցադրուող լուսանկարներուն մէջ պատկերուած եկեղեցիները, կոթողներն ու յուշարձանները£ Այս ծիրին մէջ ան առանձնայատուկ կարեւորած է Լեռնային Ղարաբաղի հայկական պատմամշակութային ժառանգութեան հանրահռչակման եւ պահպանման ուղղութեամբ միջազգային ջանքերուն գործադրումը£
Ցուցահանդէսի բացման ներկայ եղած են եւ խօսքով հանդէս եկած են նաեւ Փարիզի փոխքաղաքապետներ Առնօ Նկաչան եւ Գարին Ռոլանը, ՙL’ouvre d’Orient՚ կաթոլիկ կազմակերպութեան նախագահ Ժան-Իվ Թոլօն, նոյն կազմակերպութեան գլխաւոր տնօրէն, գերաշնորհ Փասքալ Կոլնիշը, ինչպէս նաեւ Ֆրանսայի մէջ Լեռնային Ղարաբաղի ներկայացուցիչ Յովհաննէս Գէորգեանը£
