Տանն Կիլիկիոյ Կաթողիկէ Հայոց Ն.Ա.Գ.Տ.Տ. Ռաֆայէլ-Պետրոս ԻԱ. կաթողիկոս-պատրիարքին հովանաւորութեամբ, Զմմառու Պատրիարքական Կղերին Միաբանութեան Պատրիարքական Փոխանորդ եւ ՙԶմմառու Վերափոխեալ՚ մայրավանքին մեծաւոր Գերպծ. Հ. Գէորգ Թ.Ծ.Վ. Նորատունկեանի նախագահութեամբ, եւ ՙՍուրբ Փրկիչ՚ Հայ Կաթողիկէ ժողովրդապետութեան ՙՍուրբ Ներսէս Լամբրոնացի՚ մշակութային միութեան կազմակերպութեամբª Երեքշաբթի, 27 Դեկտեմբեր 2023, երեկոյեան ժամը 8-ին, ՙՍուրբ Փրկիչ՚ եկեղեցիին կառուցման 70-ամեակին առիթով տեղի ունեցաւ ՙՏօնական Ղօղանջներ՚ խորագրով Սուրբ Ծննդեան եւ Ամանորի համերգը, Պուրճ Համմուտի ՙՅովհաննէս Պօղոսեան՚ թատերասրահին մէջ:
Ներկայ էին ժողովրդապետըª Գերյ. Հ. Մեսրոպ Ծ.Վ. Թոփալեան, փոխժողովրդապետներըª Հ. Սահակ Վրդ. Քէշիշեան ու Հ. Ռաֆայէլ Վրդ. Ժաուհարժի, ինչպէս նաեւ այլ հոգեւորականներ, անձնաւորութիւններ, կրթական, հասարակական ու միութենական պատասխանատուներ:
Բացման խօսքով հանդէս եկաւ Տիկ. Մարալ Հարպոյեան, որ անդրադարձաւ մշակոյթին կարեւորութեանª զայն նկատելով կարեւոր զէնք մըª պահպանելու համար հայ ազգը եւ լեզուն: Ան նշեց մշակոյթին հիմնական գործօնները, որոնք անհրաժեշտ են մեր ժողովուրդին պահպանումին ու զարգացումին համար: Ապա, հակիրճ ներկայացում մը կատարեց ժողովրդապետ Հօր առաջնորդութեամբ նորակազմ ՙՍուրբ Ներսէս Լամբրոնացի՚ մշակութային միութեան առաքելութեան մասին:
Այնուհետեւ, տօնական մթնոլորտի մէջ, ոգեշնչող ներկայացումներ կատարեցին պատուոյ հիւր երգիչներըª Կասիա Շատարեւեան, սոփրանօ Գլարա Ալիխանեան, թենոր Ճոնի Կէօքճեան եւ Ղազար Քէօշկէրեան: Անոնց յաջորդեց ելոյթը Հ.Կ. Մեսրոպեան բարձրագոյն ձարժարանի ՙՇուշի՚ պարախումբինª պարուսոյց ունենալով Աւօ Գարաքէշիշեան:
Ապա, փարթամ յայտագիրով եւ Նշան Մարաշլեանի ղեկավարութեամբª ՙՍ. Փրկիչ՚ եկեղեցիին ՙԱրծիւեան՚ երգչախումբը փունջ մը տօնական ու հոգեւոր երգեր ներկայացուցª արժանանալով հանդիսականներուն գնահատական ծափողջոյններուն:
Գեղարուեստական ներկայացումներէն ետք, Հ. Սահակ Վրդ. Քէշիշեան շնորհակալական խօսք ուղղեց ձեռնարկին մասնակցողներուն եւ բոլոր անոնց, որոնք նպաստեցին անոր կազմակերպութեան: Ան նաեւ ծաղկեփունջեր նուիրեց Պրն. Մանուէլ Քէշիշեանինª անոր 40- ամեայ ծառայութեան համար, ինչպէս նաեւ հիւր երգիչներուն, արուեստագէտներուն եւ դաշնակահարներ Վերոնա Ռուսեալեանին, Անթոնի Ղազալին եւ Ժորժ Լեւոնեանին:
Հանդիսութեան աւարտին խօսք առաւ Գերպծ. Հ. Գէորգ Թ.Ծ.Վ. Նորատունկեան, որ բարձր արժեւորեց գեղարուեստական ներկայացումները եւ անդրադարձաւ Պուրճ Համմուտի հայաւանին մէջ ՙՍուրբ Փրկիչ՚ ժողովրդապետութեան 70-ամեայ յատուկ առաքելութեանª զայն համարելով այն համեստ քարայրը, որ միշտ լոյս սփռած է շրջանի հայ ժողովուրդին: Մեծաւոր Հայրը կոչ ուղղեց բծախնդիր եւ ամենայն պատասխանատուութեամբ գործելու ժողովրդապետութենէն ներս: Իր խօսքին մէջ ան յիշեց ՙԱրծիւեան՚ երգչախումբին գործունէութիւնը աւելի քան 40 տարիներու ընթացքին: Ապա, ան փակեց հանդիսութիւնը ՙՊահպանիչ՚-ով եւ ՙՀայր մեր՚-ի երգեցողութեամբ:
