Հայաստանի վարչապետ Նիկոլ Փաշինեան հեռաձայնային հաղորդակցութիւն ունեցաւ Իրանի նախագահ Իպրահիմ Ռայիսիի հետ ու քննարկեց երկկողմանի համագործակցութեան զանազան թղթածրարներ, պայմանաւորուածութիւններու իրականացումի ընթացքը, ինչպէս նաեւ տարածաշրջանային խնդիրները: Փաշինեան եւ Ռայիսի մասնաւորաբար արծարծեցին տարածաշրջանային ՙ3+3՚ ձեւաչափով հարթակի աշխատանքներըª ներառեալ Թեհրանի մէջ կայացած ժողովը, զայն համարելով դրական:
Հայաստանի վարչապետը ընդունեց Միջազգային ճգնաժամային խումբի նախագահ Քոմֆորթ Էրոյի գլխաւորած պատուիրակութիւնը: Ժողովականները քննարկեցին տարածաշրջանային իրավիճակին վերաբերող հարցերը, մանաւանդ տեւական խաղաղութեան հնարաւորութիւնները, հայ-ատրպէյճանական յարաբերութիւններու կարգաւորումի հոլովոյթն ու շրջանային վերջին զարգացումները: Փաշինեան ներկայացուց բանակցութիւններուն վերաբերեալ Երեւանի դիրքորոշումներըª ներառեալ խաղաղութեան պայմանագրի սկզբունքները: Զրուցակիցները արծարծեցին Հայաստան բռնի տեղափոխուած արցախցիներուն վիճակը, Հայաստանի կառավարութեան կողմէ անոնց տրամադրուող օգնութիւնները, եւ ընդգծեցին այս հարցով Երեւանին միջազգային աջակցութիւն տրամադրելու կարեւորութիւնը:
Էրոյի գլխաւորած պատուիրակութիւնը տեսակցեցաւ նաեւ հանրապետութեան նախագահ Վահագն Խաչատուրեանի հետ եւ անկէ ծանօթացաւ Երեւանի ՙԽաղաղութեան խաչմերուկ՚ նախաձեռնութեան մանրամասնութիւններուն:
Միջազգային ճգնաժամային խումբի պատուիրակութիւնը սահմանը դիտարկող եւրոպացի դէտերուն ընկերակցութեամբ այցելեց Ատրպէյճանի հետ սահմանային գօտի: Քոմֆորթ Էրօ զարմանք յայտնեց, թէ սահմանային մարտական դիրքերը որքան մօտ են քաղաքացիական բնակավայրերուն: Ան երկու կողմերուն կոչ ուղղեց վերականգնելու խաղաղ բանակցութիւնները եւ քննարկելու սահմանազատումի թղթածրարը:
